TMU elderi qorǵanys ónerkásibi salasynda turaqty baılanys ornatyp jatyr — sarapshy

ASTANA. KAZINFORM — QR Prezıdenti janyndaǵy Qazaqstan strategııalyq zertteýler ınstıtýty Halyqaralyq qaýipsizdik bóliminiń sarapshysy, saıası ǵylymdar kandıdaty Aınur Tuqymova Gabala deklaratsııasyna qatysty pikir bildirdi.

— Gabala deklaratsııasy TMU-ǵa múshe memleketterdiń egemendik pen aýmaqtyq tutastyq qaǵıdattaryna adaldyǵyn, sondaı-aq aımaqtyq ózekti syn-qaterler boıynsha turaqty konsýltatsııalar ótkizýdiń qajettiligin rastaıdy. Qujatta TMU úılestirilgen syrtqy saıasat ustanymyn kúsheıtýdi maqsat etetini aıqyn kórinis tapqan. Syrtqy ister mınıstrleri jıi kezdesip, al jetekshi saraptamalyq ortalyqtar men ýnıversıtetter jańa Túrki strategııalyq boljaý jelisi aıasynda kúsh biriktirmek, — dedi sarapshy.

Sondaı-aq spıker deklaratsııada Aýǵanstandaǵy jaǵdaıǵa erekshe nazar aýdarylǵanyn, ondaǵy qaýipsizdikti qamtamasyz etý búkil túrki dúnıesiniń beıbitshiligi men órkendeýi úshin sheshýshi mánge ıe ekenin atap ótti.

— Uıymǵa múshe elder strategııalyq áriptestik, máńgi dostyq jáne baýyrlastyq týraly shart boıynsha jumysty jedeldetip, qorǵanys ónerkásibi salasynda turaqty baılanystar ornatyp jatyr. Ekonomıkalyq baǵytta negizgi sheshimderge qyzmetter men ınvestıtsııalar saýdasyn jeńildetý týraly kelissózderdiń bastalýy, TMU Ortalyq bankter keńesin ınstıtýtsıonalızatsııalaý jáne Túrki ınvestıtsııalyq qorynyń ókilettigin keńeıtý jatady. Klımattyq áriptestik, turaqty qarjylandyrý jáne jasyl tehnologııalardy engizý baǵytynda da naqty qadamdar bekitildi. Aımaqtyń energııa júıelerin eýropalyq naryqtarmen baılanystyratyn óńirlik «jasyl» energetıkalyq dáliz qurýǵa erekshe kóńil bólindi, — dedi Aınur Tuqymova.

Ol sondaı-aq deklaratsııada Transkaspıı halyqaralyq kólik dálizine erekshe mán berilgenin atap ótti.

— Memleketter tsıfrlyq ıntegratsııany, erejelerdi birizdendirýdi jáne logıstıkany damytýdy aımaqtyń tranzıttik básekege qabilettiligin arttyrýdyń negizgi sharty retinde atap ótti. Záńgezýr dálizi men Baký–Tbılısı–Kars temirjolyn damytý, sondaı-aq Qytaı–Qyrǵyzstan–Ózbekstan magıstralin ilgeriletý jobalaryna qoldaý bildirildi, — dep túıdi sózin sarapshy.

Aıta keteıik, buǵan deıin Túrki memleketteri uıymy HІІ sammıtinde Gabala deklaratsııasyna qol qoıylǵanyn jazǵan edik.