TMU elderi kelesi jyly birlesken spýtnıkti iske qosady
ASTANA. KAZINFORM – Túrkistan qalasynda ótken Túrki memleketteri uıymynyń beıresmı sammıtinde Qazaqstan tsıfrlyq bolashaqtyń strategııalyq paıymyn tanystyrdy, onda «ǵaryshtyq dıplomatııa» qazirdiń ózinde praktıkalyq jemisin berýde.
Jasandy ıntellekt jáne tsıfrlyq damý mınıstrligi Ázerbaıjan, Túrkııa jáne Ózbekstannan kelgen áriptesterimen tyǵyz yntymaqtastyqta jasap jatqan CubeSat-12U ǵylymı-tehnologııalyq spýtnıgi negizgi jobaǵa aınaldy. Jumyla atqaralyp jatqan jumysta, Astanadaǵy ǵarysh salasynyń qazaqstandyq mamandary otandyq Qurastyrý-synaý kesheniniń bazasynda jobalaý men jalpy qurastyrýǵa jaýapty, Ózbekstan tarapy qozǵaltqysh qondyrǵysyn ázirleýde, al Túrkııadan kelgen seriktester jobany kún panelderimen jáne baǵdarlamalyq jasaqtamamen qamtamasyz etýde.
— Biz úshin bul joba — jaı ǵana kezekti apparatty iske qosýdan áldeqaıda joǵary. Bul — bizdiń elderimiz úshin alǵashqy naqty tehnologııalyq qurastyrý núktesi. Biz qazaqstandyq spýtnık jasaý isi, ózbek ınjenerııasy, túrik IT-sheshimderi sııaqty quzyretterdi biriktirdik. Kelesi jyly spýtnık orbıtaǵa shyqqanda, bul túrki memleketteriniń eń kúrdeli ǵylymı mindetterdi birlesip iske asyrýǵa qaýqarly ekenin dáleldeıtin ortaq tabys bolady, — dep atap ótti Premer-mınıstrdiń orynbasary — Jasandy ıntellekt jáne tsıfrlyq damý mınıstri Jaslan Mádıev.
Joba syzba satysynan, júıelerdi «temirde» qurastyrý kezeńine ótti jáne ony iske qosý kelesi jylǵa josparlanǵan. Bul túrki memleketteriniń tehnologııalyq ambıtsııalarynyń salmaqtylyǵyn rastaıtyn mańyzdy beles bolmaq.
Qazirgi ýaqytta qatysýshy elder mıssııanyń sátti bastalýyn qamtamasyz etý úshin TMU Hatshylyǵy arqyly quqyqtyq jáne uıymdastyrýshylyq máselelerdi pysyqtaýdy aıaqtap jatyr. Mundaı kooperatsııa tek tájirıbe almasyp qana qoımaı, ortaq ınjenerlik mektep pen orbıtadaǵy jańa birlesken ashylýlar úshin negiz bolatyn naqty joǵary tehnologııalyq ónimdi jasaýǵa múmkindik beredi.
Aıta ketelik Búgin Túrkistan qalasynda Prezıdent Qasym-Jomart Toqaevtyń qatysýymen Túrki memleketteri uıymynyń beıresmı sammıti bastalǵan edi.
