TMU baıqaýshylary Quryltaı saılaýyn joǵary baǵalady
ASTANA. KAZINFORM – Qazaqstandaǵy Quryltaı depýtattarynyń saılaýyn baqylaǵan Túrki memleketteri uıymynyń halyqaralyq mıssııasy daýys berý protsesiniń ashyq ótkenin atap ótti. Baıqaýshylar saılaý ýchaskelerinde azamattardyń erkin daýys berýine qajetti jaǵdaı jasalǵanyn jáne saılaý nátıjesine yqpal etýi múmkin eleýli zańbuzýshylyqtar tirkelmegenin TMU Bas hatshysynyń orynbasary, mıssııa basshysy Nýrý Gýlıev málimdedi.
Onyń aıtýynsha, mıssııa quramyna TMU Hatshylyǵynyń ókilderi jáne Ázerbaıjan, Qyrǵyzstan, Túrkııa jáne Ózbekstan memleketteriniń Ortalyq saılaý komıssııalarynyń ókilderi kirdi.
– Saılaý kúni mıssııa eki topqa bólinip, Astanadaǵy №194 jáne №228 saılaý ýchaskeleriniń ashylýyna qatysty. Osy kúnderdiń barlyǵynda saılaý protsesi ulttyq saılaý zańnamasyna sáıkes ótti. Jalpy, mıssııamyz daýys berý barysyn baqylaý jáne túrli baǵyttar boıynsha baıqaý júrgizý úshin 32 saılaý ýchaskesine bardy, – dedi Nýrý Gýlıev.
Mıssııa basshysy baıqaý barysynda saılaý protsesine qatysty eshqandaı zańbuzýshylyq nemese aralasý faktisi anyqtalmaǵanyn atap ótti.
– Mıssııa eshqandaı zańbuzýshylyqty, saılaý protsesine aralasý jaǵdaılaryn anyqtaǵan joq. Sonymen qatar azamattardyń óz erkin bildirý bostandyǵyn qamtamasyz etý úshin saılaý kúni barlyq qajetti ákimshilik sharalar qabyldanǵanyn atap ótemiz, – dedi ol.
TMU baıqaýshylar mıssııasy Astanadaǵy №39 saılaý ýchaskesiniń ashylýyna jáne ondaǵy daýystardy sanaý rásimine de qatysty. Onyń aıtýynsha, daýystardy sanaý jáne saılaý nátıjelerin jarııalaý Qazaqstannyń ulttyq saılaý zańnamasyna sáıkes júrgizilgen.
– Mıssııa saılaý nátıjelerine áser etýi múmkin qandaı da bir eleýli zańbuzýshylyqtardy anyqtaǵan joq. Sondaı-aq saılaý ýchaskelerine kelgen azamattardyń esh kedergisiz kirip-shyǵýyna múmkindik berilgenin baıqadyq. Halyqaralyq baıqaýshylar da kez kelgen saılaý ýchaskesine erkin kirip, baıqaý júrgizgisi kelgen jerde erkin qozǵala aldy. Bul saılaý protsesiniń ashyqtyǵy men eseptiligin qamtamasyz etti, – dedi mıssııa basshysy.
Sonymen qatar spıkerdiń aıtýynsha, mıssııa saılaý ýchaskelerinde ruqsat etilmegen úgit-nasıhat jumystary nemese úgit materıaldary bolmaǵanyn atap ótti. Sondaı-aq saılaý komıssııalarynyń jumysyna nemese saılaýshylardyń tańdaýyna qandaı da bir jolmen yqpal etý áreketteri tirkelmegen.
– Qazaqstan Respýblıkasyndaǵy saılaýdy baqylaý jónindegi halyqaralyq mıssııa saılaýdyń ulttyq jáne halyqaralyq standarttarǵa sáıkes ashyq ári móldir ótkizilgenin málimdeıdi. Osy oraıda baýyrlas Qazaqstan Respýblıkasynyń azamattaryn saılaýdyń sátti ótýimen quttyqtaımyz. Sondaı-aq saılaý nátıjeleri eldegi turaqtylyq pen órkendeýdiń jańa kezeńine óz úlesin qosady dep úmittenetinimizdi taǵy da rastaımyz, – dep túıindedi Nýrý Gýlıev.
Sonymen qatar ShYU baıqaýshylar mıssııasy Quryltaı saılaýyn demokratııalyq ári ashyq ótti dep baǵalady.
