TMRA óńirlerde kadrlyq aýys-túıisti bastady - 4 departament basshysy aýysty

ASTANA. 26 tamyz. QazAqparat - QR Tabıǵı monopolııalardy retteý agenttiginiń tóraǵasy Murat Ospanovtyń sybaılas jemqorlyqqa qarsy kúres máseleleri jónindegi selektorlyq keńeste bergen tapsyrmasy boıynsha vedomstvonyń aýmaqtyq departamentteri basshylaryn qaıta taǵaıyndaý bastaldy.

Agenttik baspasóz qyzmetiniń aqparatyna qaraǵanda, qaıta taǵaıyndaý maqsaty - tabıǵı monopolııalar jáne retteletin naryqtar týraly zańnamany iske asyrýdy baqylaýdy kúsheıtý
.
Sonymen agenttiktiń Batys Qazaqstan oblysy boıynsha departamentiniń basshysy Shyrynáli Úsenov vedomstvonyń Qaraǵandy oblysy boıynsha departamentine osyndaı laýazymǵa aýystyryldy.

Óz kezeginde TMRA-nyń Qaraǵandy oblysy boıynsha aýmaqtyq departamentiniń basshysy Tólegen Maksılov TMRA-nyń Aqmola oblysy boıynsha departamentiniń basshysy bolyp aýysty.

TMRA-nyń Aqmola oblysy boıynsha aýmaqtyq departamenti dırektorynyń laýazymyn atqarǵan Erbol Esirkepov agenttiktiń Batys Qazaqstan oblysy boıynsha departamentin basqaratyn boldy.

Agenttiktiń ortalyq apparaty Baqylaý jáne talap qoıý jumysy departamentiniń burynǵy dırektory Asylbek Alaman TMRA-nyń Aqmola oblysy boıynsha departamenti basshysynyń orynbasary boldy.

TMRA aýmaqtyq departamentteriniń basshylaryn aýystyrý jumysy jalǵasýda.