TMRA qyzmetkerleriniń para alýlaryna baılanysty birqatar basshylar laýazymdarymen qoshtasty
ASTANA. 1 naýryz. QazAqparat - Tabıǵı monopolııalardy retteý agenttiginiń birqatar laýazym ıeleri «para» alyp ustalǵannan keıin vedomstvoda lıtsenzııa berý jumystary elektrondy jolmen júrgizile bastady.
Bul týraly búgin Tabıǵı monopolııalardy retteý agenttigi men onyń aımaqtaǵy qurylymdarynda sybaılas jemqorlyqpen kúres máselelerine arnalǵan májiliste atalmysh vedomstvonyń jaýapty hatshysy Rýslan Ahmetov málim etti.
Onyń derekterine qaraǵanda, Óskemen qalasy sotynyń úkimimen ótken jyly Shyǵys Qazaqstan oblystyq Tabıǵı monopolııalardy retteý departamentiniń burynǵy bastyǵynyń orynbasary Kákirbaev jáne osy departamenttiń Tehnıkalyq retteý bóliminiń burynǵy bastyǵy Kalıahmetov «para» alǵany úshin sottaldy. «Óz qaramaǵyndaǵy qyzmetkeriniń jemqorlyq áreketine jol bergeni úshin Shyǵys Qazaqstan oblystyq Tabıǵı monopolııalardy retteý departamentiniń bastyǵy Qudamanov qyzmetinen bosatyldy»,-dedi Jaýapty hatshy.
Onyń derekterine qaraǵanda, Tabıǵı monopolııalardy retteý agenttigindegi «para» alýdyń sońǵy faktisi ótken jyly tirkeldi. Jemqorlyq áreketine jol bergeni úshin Astana qalalyq Tabıǵı monopolııalardy retteý departamentiniń qyzmetkeri Shaıhov ustaldy. Osy sebepti Astana qalasynyń Tabıǵı monopolııalardy retteý departamentine de jańa basshy taǵaıyndaldy. «Osy aıtylǵan «para» alý jaǵdaıynyń úsheýi de lıtsenzııa berý máselesimen baılanysty bolyp otyr. Osy sebepti, ıaǵnı vedomstvoda sybaılas jemqorlyq áreketteriniń oryn alýyna yqpal etetin faktorlardy joıý maqsatynda lıtsenzııa berý máselesi elektrondy tásilmen júzege asyrylatyn boldy»,-dedi R.Ahmetov.
