TMRA kommýnaldyq qyzmetter tarıfinen monopolısterdiń birqatar shyǵystaryn alyp tastaýdy usynady

ASTANA. 24 maýsym. QazAqparat - Elimizde kommýnaldyq qyzmetter tarıfinen monopolısterdiń birqatar shyǵystaryn alyp tastaýy usynylady. Bul týraly búgin Úkimet otyrysynda Tabıǵı monopolııalardy retteý agenttiginiń tóraǵasy Murat Ospanov aıtty.

Tarıfke júktemeni tómendetýdi qamtamasyz etetin túzetýler ázirlengenin atap ótken ol: «Tarıfterden ókildik shyǵystardy, aýdıtorlyq jáne marketıngtik qyzmetterge arnalǵan shyǵystardy, bank komıssııasyn, qarjylyq jáne tehnıkalyq saraptamaǵa arnalǵan shyǵyndardy alyp tastaý usynylady», - dedi.

Agenttik basshysynyń atap ótýinshe, monopolıst ótinimge qosa berýi tıis qujattar tizbesi 50 paıyzǵa qysqaryp, basqa talaptar alynyp tastalǵan.

«Bul tutynýshylardyń qarajattaryn tarıftik retteý sapasy úshin zalalsyz únemdeýge múmkindik beredi», - dedi M.Ospanov.