TMRA eks-tóraǵasy M.Ospanovtyń isi boıynsha qorǵaýshylardyń ótinimhaty qabyldanbady
ASTANA. QazAqparat - QR Tabıǵı monopolııalardy retteý agenttiginiń burynǵy tóraǵasy Murat Ospanovtyń isi boıynsha sotta negizgi kýágerlerdiń biriniń jaýabyn qatystyrmaý týraly qorǵaýshylardyń qoldaýhaty qabyldanbady. Bul týraly búgin «QazAqparat» tilshisine Astananyń qylmystyq ister jónindegi mamandandyrylǵan aýdanaralyq sotynan habarlady.
Atap aıtqanda, búgin atalǵan sottyń sýdıasy Erbol Rahımbekov tıisti qaýlyny jarııa etti. Bunyń aldynda aıyptalýshynyń qorǵaýshylary M.Ospanovtyń kómekshisi Berik Ergeshevtiń jaýaptary men túsinikterin istiń materıaldarynan alyp tastaý týraly ótinimhat joldaǵan bolatyn. Búgingi sot tyńdaýy barysynda sýdıa Erbol Rahımbekov aldyn ala tergeý barysynda Ergeshevtiń dálelderi tekserilgenin jáne olar naqtylanǵanyn negizge ala otyryp, Ospanov qorǵaýshylary qoldaýhatyn qabyl almaý týraly qaýly etti. Tergeý nusqasy boıynsha, aqsha QR Tabıǵı monopolııalardy retteý agenttiginiń burynǵy tóraǵasyna para retinde Ergeshev arqyly tapsyrylǵan. Aıta keteıik, kýáger B. Ergeshev sotta jaýap bergen bolatyn. Qorǵaýshylardyń paıymynsha, onyń aıǵaqtary qysym kórsetý arqyly alynǵan. Eske sala keteıik, 2014 jyldyń 2 shildesinde Qarjy polıtsııasy Tabıǵı monopolııalardy retteý agenttiginiń tóraǵasy Murat Ospanovty tutqyndaǵanyn málimdegen bolatyn. Olardyń málimetinshe, M. Ospanov 200 myń dollar kóleminde para aldy degen kúdikpen ustalǵan. Artynsha belgili bolǵandaı, para kólemi 300 myń ekeni anyqtaldy. 3 shilde kúni Astana qalasy Almaty aýdandyq № 2 soty TMRA burynǵy basshysyn ustaýǵa sanktsııa jarııalady. Murat Ospanovtyń isi boıynsha sot 11 qarashada bastaldy. Kelisi sot tyńdaýlary 24 qarashaǵa belgilenip otyr.
