TMRA eks-tóraǵasy M.Ospanov qashýǵa áreket jasaǵan - Qarjy polıtsııasy
ASTANA. QazAqparat - Qarjy polıtsııasy agenttigi asa iri kólemde para aldy degen aıyp taǵylyp otyrǵan Tabıǵı monopolııalardy retteý agenttiginiń burynǵy tóraǵasy M.Ospanovtyń qorǵaýshysy H.Aıtqalıevanyń buqaralyq aqparat quraldary arqyly taratqan málimeti shyndyqqa sáıkes kelmeıtindigin habarlaıdy.
Ospanov 2014 jylǵy 1 shildede Qarjy polıtsııasy agenttiginde jaýap berýden keıin ustalǵan bolatyn.
Ony ýaqytsha ustaý abaqtysyna toǵytqan kezde sot-medıtsınalyq saraptamasy júrgizilgen. Ol boıynsha Ospanovta dene jaraqatynyń joqtyǵy anyqtalǵan.
Kelesi kúni, 2014 jylǵy 2 shildede 10 saǵat 30 mınýttardyń shamasynda Ospanovty ýaqytsha ustaý abaqtysynan Agenttik ǵımaratyna alyp kelý kezinde, ol ózin nashar sezinýine baılanysty avtomashınany toqtatýdy suraǵan.
Birden esikti ashyp jáne avtomobıl salonynan júgirip shyǵyp, Ospanov qashýǵa áreket jasaǵan. Agenttik qyzmetkerleri avtomashınadan 15 metr jerde ony ustap, bul áreketine tosqaýyl qoıdy.
Agenttik qyzmetkerlerimen ustalǵan Ospanov olarǵa qarsylyq bildirgen, nátıjesinde onyń ózi jáne qarjy polıtsııasy qyzmetkeri jerge qulap, dene jaraqatyn alǵan.
Bul fakt birden Agenttiktiń Aryzdar men aqparatty esepke alý jýrnalyna tirkelgen, Ospanov pen ony qaraýyldaǵan qyzmetkerlerge qatysty dene jaraqatyn anyqtaý maqsatynda sot-medıtsınalyq saraptama taǵaıyndalǵan.
Saraptama qorytyndysymen Ospanov pen ony ustaǵan qyzmetkerdiń denelerinde kógergen isikter men jara túrindegi jaraqat anyqtalǵan.
Osy kúni Ospanov ózi jaldaǵan advokattyń kózinshe atalǵan mán-jaılardy tolyq moıyndady.
Oǵan qosa, kelesi kúni - 2014 jylǵy 3 shildede qamaýǵa alýdy sotta sanktsııalaý kezinde, prokýror, advokat jáne óz týysqandarynyń kózinshe Ospanov sotqa qarjy polıtsııasy qyzmetkerlerine eshqandaı narazylyǵynyń joq ekendigin jáne bul jaıttyń oryn alýyna ózi sebep bolǵandyǵyn aıtqan.
«Osyǵan oraı qashýǵa baılanysty oryn alǵan jaǵdaıdan 2 apta ótken soń Ospanovtyń qorǵaýshysynyń buqaralyq aqparat quraldaryna bergen qarjy polıtsııasy qyzmetkerleriniń zańsyz is-áreketine qatysty túsindirmeleri orynsyz bolyp kórinedi. Sebebi Ospanovtyń ózi búgingi kúnge deıin bundaı aryzdarmen júginbegen», - delingen habarlamada.
