TMPA mıssııasynyń basshysy Quryltaı saılaýyn tarıhı oqıǵa dep atady
ASTANA. KAZINFORM — Túrki memleketteri Parlamenttik Assambleıasy (TMPA) mıssııasynyń basshysy, TMPA-nyń Quqyqtyq máseleler jáne halyqaralyq qatynastar jónindegi komıssııasynyń tóraǵasy, Túrkııa Uly Ulttyq Májilisiniń depýtaty Osman Mesten Qazaqstandaǵy Quryltaı depýtattaryn saılaýdy uıymdastyrý men ótkizilýine joǵary baǵa berdi.
— Búgin – Qazaqstan Respýblıkasy úshin tarıhı oqıǵa. Búgin sizdermen birge osynda bolǵanyma óte qýanyshtymyn. Bul – shynymen de tarıhı kezeń. Biz, Túrki memleketteri Parlamenttik Assambleıasy retinde, saılaýdy baqylaý úshin Qazaqstanǵa keldik, – dedi Osman Mesten Astanadaǵy Halyqaralyq baıqaýshylar men sheteldik BAQ ókilderine járdemdesý ortalyǵynda ótken brıfıngte.
Onyń aıtýynsha, Qazaqstan azamattardyń saılaý quqyqtaryn qamtamasyz etý úshin aýqymdy daıyndyq jumystaryn júrgizgen. Atap aıtqanda, shetelde júrgen qazaqstandyqtar úshin 61 memlekette saılaý ýchaskeleri ashylǵan.
— Qazirgi ýaqytta Qazaqstan Respýblıkasy barlyq azamattarynyń tańdaý jasaý quqyǵyn qamtamasyz etti. Barlyq saılaý Konstıtýtsııaǵa, konstıtýtsııalyq zańǵa jáne halyqaralyq standarttarǵa sáıkes ótip jatyr. Ortalyq saılaý komıssııasynyń bul úshin barlyq qajetti sharalardy qabyldaǵanyn kórip otyrmyz, – dep atap ótti mıssııa basshysy.
Ol TMPA ókilderiniń tórt baıqaýshylar tobynyń quramynda jumys istep jatqanyn habarlady. Saılaý ýchaskeleri ashylǵan sátten bastap olar Astana men elimizdiń ózge de qalalaryndaǵy saılaý ýchaskelerine baryp, baqylaý júrgizip jatyr.
— Ýchaskeler ashylǵan kezde barlyq talaptyń saqtalǵanyn jáne halyqaralyq standarttarǵa sáıkes ótkenin kórdik. Eń aldymen, Qazaqstan Respýblıkasynyń Ánurany oryndaldy. Sonymen qatar saılaý komıssııalarynyń músheleri bul ýaqytta ýchaskelerde jumys istep, azamattarǵa bıýlletenderdi toltyrý kezinde eshqandaı qysym kórsetpeı, barlyq qajetti jaǵdaıdy qamtamasyz etti. Qazirgi ýaqytta bizdiń delegatsııamyz munyń bárin rastady, – dedi Osman Mesten.
Sondaı-aq, mıssııa basshysy TMPA ókilderiniń Qazaqstandaǵy barlyq saıası partııalardyń basshylarymen kezdesýge múmkindik alǵanyn aıtty.
Onyń sózinshe, Qazaqstan sońǵy jyldary eleýli saıası jáne quqyqtyq reformalardy júzege asyryp keledi.
— Bizdiń oıymyzsha, Qazaqstan, ásirese sońǵy ýaqytta Prezıdent Qasym-Jomart Toqaevtyń basshylyǵymen, tek saıası ǵana emes, quqyqtyq turǵydan da óte aýqymdy reformalar júrgizip jatyr. Bul – progreske bastaıtyn, adam quqyqtaryn, azamattardyń quqyqtaryn, azamattar men memlekettiń birligin basty orynǵa qoıatyn asa mańyzdy reformalar, – dedi Osman Mesten.
Mıssııa basshysy jańa Parlamenttegi áıelder ókildiginiń artqanyn da jeke atap ótti.
— Parlamenttegi áıelderdiń ókildigin arttyrý baǵytynda óte mańyzdy qadam jasaldy. Quryltaıda keminde 30 paıyzdyq kvota qarastyrylǵan, alaıda partııalyq tizimder boıynsha bul kórsetkish asyp túsip, 44 paıyzdy qurady. Meniń oıymsha, bul – óte mańyzdy kórsetkish, – dep atap ótti ol.
Búgin elimizdiń barlyq óńirinde Quryltaı depýtattaryn saılaý bastaldy. Daýys berý 10 423 saılaý ýchaskesinde ótedi.
