TMD jastary «ǵasyr indetin» talqylaý úshin Almatyǵa jınaldy
«Almaty - jastardyń qalasy, sondyqtan jastar salamatty ómir salty men túrli aýrýlardan saqtanýdyń jolyn bilýi shart. Almatyda JITS aýrýyna shaldyqqan 5000 adamnyń 36 paıyzy jastar. JITS týraly bilý odan saqtanýǵa da úıretedi. Ol týraly az aıtylyp jatqan joq. Joǵary, orta arnaıy bilim oryndarynda trenıngter, semınarlar, flesh-mobtar, aktsııalar uıymdastyryp, jastarǵa bul dert týraly jetkizýge tyrysamyz. Búgingi shara da Almaty úshin aýqymdy jobanyń biri», - dedi Almaty ákiminiń orynbasary Murat Dáribaev.
Qala ákimi orynbasarynyń aıtýynsha, «bul halyqaralyq pikirsaıys týrnıri jastardy atalǵan taqyrypqa ǵylymı, áleýmettik turǵyda qaraýǵa shaqyrady». Ol sondaı-aq atalǵan pikirsaıys jaqynda ǵana Almaty ákimi qol qoıyp, qosylǵan JITS/AQTV-ǵa qarsy álem astanalarynyń birlesken Parıj deklaratsııasyn shynaıy túrde júzege asyrý ekenin aıtty.
Pikirsaısqa qatysýshylar arasynda 2017 jyldyń úzdik baıandamashylary bar. Olardyń ishinde tóreshi Raffı Marshall (Oksford), KIMEP, QBTÝ, QazUTÝ, QazUÝ, EÝU jáne t.b JOO stýdentteri bar. TMD elderinen barlyǵy 300 stýdent sharaǵa qatysty.
QR Densaýlyq saqtaý mınıstrligi ǵylym jáne adamı resýrstar departamentiniń dırektory Aıgúl Qaptaǵaeva pikirsaıys jastar úshin ǵana emes, adamzat úshin mańyzdy ekenin aıtty.
«Jastardyń bastamasy, ıdeıalary álemdik qaterge aınalǵan indetke qarsy kúreste jemisin beredi. Damý úshin biz qoǵam ishinde ómir súrip jatqanymyzdy umytpaýymyz kerek. Kúmándi jaqyndasý, nasha paıdalaný bul úlken qaýip, kóp jastar oǵan ózdiginen qarsy tura almaıdy. Oǵan jalǵan sezimderge ermeı, jetistikke jetýdi ómirlik maqsaty etip alǵandar qarsy tura alady. JITS-ke qarsy dárigerlik vaktsına joq bolǵanymen, áleýmettik dári bar. Ol - bilim», - dedi Aıgúl Qaptaǵaeva.
Týrnır brıtan parlamentiniń formatynda qazaq, aǵylshyn, orys tilderinde ótip jatyr. 
Aıta keteıik, Almatyda jastardy qoldaýǵa arnalǵan «Almaty jastary» turǵyn úı baǵdarlamasy iske qosylǵan bolatyn. Baǵdarlama boıynsha 35 jasqa deıingi almatylyqtarǵa jeke páterge qol jetkizý úshin jeńildetilgen qaryz beriledi.
Bul baǵdarlamany júzege asyrý úshin Almaty ákimdigi «Turǵyn úı qurylysjınaqbankimen» yntymaqtastyq kelisimine qol qoıǵan. 
