TMD jastar sımfonııalyq orkestri jańa quram jasaqtaıdy

NUR-SULTAN. QazAqparat – TMD-ǵa qatysýshy memleketterdiń Memleketaralyq gýmanıtarlyq yntymaqtastyq qory Jastar sımfonııalyq orkestriniń quramyna qabyldaý úshin mýzykanttardy irikteý týraly habarlady, dep jazady QazAqparat TMD Atqarýshy komıtetiniń saıtyna silteme jasap.

Baıqaýǵa Ázerbaıjan, Armenııa, Belarýs, Qazaqstan, Qyrǵyzstan, Moldova, Reseı, Tájikstan, Túrkimenstan, Ózbekstan elderiniń 35 jasqa deıingi kásibı mýzykanttary qatysa alady. Baıqaý kelesi mamandyqtar boıynsha júrgiziledi: skrıpka, alt, vıolonchel, kontrabas, fleıta, goboı, klarnet, fagot, valtorna, trombon, barabandar, soqpaly aspaptar, arfa.

Baıqaýǵa qatysý úshin saýalnamany toltyryp, baıqaý baǵdarlamasynyń jumystaryn oryndaý beınebaıanyn jiberý kerek. Ótinim úlgisi jáne konkýrsqa qatysý sharttarymen JSO-nyń veb-saıtyndaǵy «Qujattar» bóliminde tanysýǵa bolady. Baıqaý merzimi - 1 mamyr-1 maýsym aralyǵy.

Baıqaý irikteýinen ótken qatysýshylar TMD jastar sımfonııalyq orkestrine qabyldanyp, ansambldiń Dostastyq elderindegi gastroldik qoıylymdaryna qatysady.

Jastar sımfonııalyq orkestri – TMD-ǵa qatysýshy memleketterdiń Memleketaralyq gýmanıtarlyq yntymaqtastyq qorynyń mańyzdy jobalarynyń biri. Orkestr alǵash ret 2007 jyly quryldy. Oǵan dástúrli túrde Dostastyq elderiniń jas mýzykanttary, bedeldi mýzykalyq baıqaýlardyń laýreattary men jeńimpazdary kiredi. Osy jyldar ishinde orkestrge belgili dırıjerler ıÝrıı Sımonov, Vladımır Spıvakov, Vasılıı Valıtov jetekshilik etti.

Bıyl orkestr Reseıdiń halyq ártisi Sergeı Skrıpkanyń jetekshiligimen Reseı memlekettik sımfonııalyq kınematografııa orkestriniń negizinde óner kórsetedi.