«TMD úshin 100 ıdeıa» baıqaýynda qazaqstandyq startap joba jeńimpaz atandy

NUR-SULTAN. QazAqparat - Armenııada TMD elderiniń Jastar isi jónindegi keńesi sheńberinde «TMD úshin 100 ıdeıa» baıqaýynyń fınaldyq kezeńi ótti, dep habarlaıdy QazAqparat QR Aqparat jáne qoǵamdyq damý mınıstrliginiń baspasóz qyzmetine silteme jasap.

Qazylar alqasynyń sheshimimen «TMD-ǵa arnalǵan 100 ıdeıa» baıqaýynyń jeńimpazdary bolyp túrli baǵyttar men nomınatsııalar boıynsha 12 joba tanyldy.

Avıatsııalyq, ǵaryshtyq jáne kólik júıeleri nomınatsııasynda Kókshetaý joǵary tehnıkalyq kolledjiniń 5 kýrs stýdenti Kaır Álıhan «Taza sýtegimen jumys isteıtin qozǵaltqysh» jobasymen jeńimpaz atandy.

Jalpy, baıqaýda 11 jas qazaqstandyq 10 baǵyt boıynsha ózderiniń startap-jobalaryn usyndy.

Atap keteıik, QR Aqparat jáne qoǵamdyq damý mınıstrligi Qazaqstannyń atynan Ulttyq delegatsııany jasaqtap, onyń quramyna ınnovatsııalyq ıdeıalary bar talantty jastar kirgen bolatyn.

Baıqaýdyń fınalynda Reseı, Armenııa, Belarýs, Qyrǵyzstan, Ózbekstan jáne Tájikstannyń jobalary usynyldy. Barlyq TMD elderinen barlyǵy 50 ótinim berildi.

Anyqtama: «TMD úshin 100 ıdeıa» jobasy 2014 jyldan bastap eki jylda bir ret kezeń-kezeńimen júzege asyrylady, eki kezeńnen turady: Ulttyq (irikteý) jáne halyqaralyq (fınal). Jobaǵa TMD – ǵa qatysýshy memleketterdiń avtorlyq jobalaryn usynǵan 14-35 jas aralyǵyndaǵy jastar qatysa alady.