TMD saılaý organdary basshylarynyń otyrysynda referendým men JI máseleleri talqylandy
ASTANA. KAZINFORM – 19 aqpanda Sankt-Peterbýrg qalasynda Qazaqstannyń tóraǵalyǵymen Táýelsiz Memleketter Dostastyǵyna qatysýshy memleketterdiń saılaý organdary basshylarynyń Konsýltatıvtik keńesiniń VII otyrysy ótti.
Іs-sharaǵa TMD elderiniń ortalyq saılaý organdarynyń basshylary men ókilderi, TMD Atqarý komıtetiniń jáne TMD Parlamentaralyq assambleıasynyń basshylyǵy, MIMRD TMD PAA, sondaı-aq elektoraldyq saladaǵy jastar saıasaty jónindegi Jumys tobynyń ókilderi qatysty. Sonymen qatar Túrkııa Respýblıkasynyń Joǵary saılaý keńesiniń tóraǵasy Ahmet Iener jáne Serbııa Respýblıkasynyń Respýblıkalyq saılaý komıssııasynyń múshesi Velko Perovıch qatysty.
Qazaqstan Respýblıkasy Ortalyq saılaý komıssııasynyń tóraǵasy Nurlan Ábdirov 15 naýryzǵa taǵaıyndalǵan respýblıkalyq referendýmǵa daıyndyq barysy týraly málimdedi. Onyń aıtýynsha, barlyq uıymdastyrýshylyq sharalar ulttyq zańnama men bekitilgen kúntizbelik josparǵa sáıkes júrgizilýde. Protsedýralardyń ashyqtyǵyn qamtamasyz etýge, komıssııa múshelerin oqytýǵa jáne múgedektigi bar azamattardy qosa alǵanda, barlyq sanattaǵy saılaýshylar úshin jaǵdaı jasaýǵa erekshe nazar aýdarylyp otyr.
«Sonymen qatar biz halyqaralyq baıqaýshylarmen jáne sarapshylar qaýymdastyǵymen ózara is-qımylǵa ashyqpyz. Birlesken jumys referendýmdy joǵary uıymdastyrýshylyq deńgeıde jáne halyqaralyq standarttarǵa tolyq sáıkes ótkizýge múmkindik beredi», – dedi Nurlan Ábdirov.
Elektoraldyq pikirtalas barysynda Armenııa, Reseı, Tájikstan, Ózbekstan, Qyrǵyzstan jáne Belarýs saılaý organdarynyń basshylary óz elderindegi aldaǵy saılaý naýqandary, reformalar jáne tehnologııalyq jańashyldyqtar týraly baıandady. Baıandamalarda qaǵaz bıýlletenderdi paıdalaný, onlaın elementterdi engizý, saılaýaralyq kezeńdegi jumystar, jastardyń quqyqtyq saýattylyǵyn arttyrý jáne saılaý júıesine senimdi kúsheıtý máseleleri qozǵaldy.
TMD PAA Keńesiniń Bas hatshysy Dmıtrıı Kobıtskıı «Saılaý men referendýmdardy halyqaralyq baıqaý qaǵıdattarynyń deklaratsııasy týraly» aqparat berdi. Belarýs OSK hatshysy Elena Baldovskaıa Konsýltatıvtik keńestiń Dúnıejúzilik saılaý organdary qaýymdastyǵynyń qyzmetine qatysý máselesin qarastyrýdy usyndy. Bul usynysty qosymsha zerdeleý týraly sheshim qabyldandy.
Otyrys aıasynda «Saılaý jáne referendým ınstıtýtyna senimdi qalyptastyrý: halyqaralyq baıqaýdyń róli» taqyrybynda halyqaralyq ǵylymı-praktıkalyq konferentsııa ótti. Onyń sheńberinde «Jasandy ıntellekt jáne onyń saılaý protsesinde qoldanylýy: keshendi tásil jáne quqyqtyq retteý» taqyrybynda dóńgelek ústel uıymdastyryldy. Negizgi baıandamany QR OSK hatshysy Shavhat Ótemisov usyndy.
Onyń aıtýynsha, jasandy ıntellekt memleketterdiń básekege qabilettiliginiń jáne tehnologııalyq táýelsizdiginiń mańyzdy faktory bolyp otyr. Búginde ol saılaý protsesterinde tsıfrlyq servıster, analıtıka, kıberqaýipsizdik jáne jalǵan aqparatqa qarsy is-qımyl baǵyttarynda qoldanylýda.
Konferentsııa qarsańynda elektoraldyq saladaǵy jastar saıasaty jónindegi Jumys tobynyń otyrysy ótti. Qatysýshylar jastardy saılaý úderisterine tartýdyń bilim berý, aǵartýshylyq jáne tájirıbelik formattaryn talqylady. Qazaqstan tarapynan Gúlzıra Atabaeva Jas saılaýshylar klýbtary arqyly jastardy júıeli ıntegratsııalaý modelin usyndy. Ámirlan Nurǵazın jastardyń saılaýǵa degen kózqarasyn ǵylymı turǵydan zertteýdiń mańyzyn atap ótti.
Jıyndy qorytyndylaı kele, Nurlan Ábdirov talqylaýlardyń mazmundylyǵyn jáne olardyń praktıkalyq mańyzyn atap ótti. Onyń aıtýynsha, TMD elderi arasyndaǵy elektoraldyq yntymaqtastyq azamattardyń saılaý jáne referendým ınstıtýttaryna degen senimin nyǵaıtýǵa yqpal etedi.
Іs-shara sońynda qatysýshylarǵa «Qazaqstandaǵy saılaý: qysqa da nusqa» atty kitap tabystaldy. Sonymen qatar saılaý tehnologııalarynyń evolıýtsııasyna arnalǵan kórme uıymdastyryldy.
Aıta keteıik, Erlan Qarın Jańa Konstıtýtsııa qoǵam suranysyna saı jańarǵanyn habarlady.