TMD sammıtinde 2030 jylǵa deıingi áskerı yntymaqtastyq tujyrymdamasy bekitildi

ASTANA. KAZINFORM – Tıisti sheshim Dýshanbe qalasynda ótken Táýelsiz Memleketter Dostastyǵy memleket basshylary keńesiniń kezekti otyrysynda qabyldandy, dep habarlaıdy Kazinform agenttiginiń menshikti tilshisi.

TMD memleketteriniń basymdyqtaryna sáıkes, áskerı saladaǵy yntymaqtastyq ashyq, boljamdy jáne dáıekti túrde beıtarap sıpatqa ıe, sondaı-aq úshinshi elderge qarsy baǵyttalmaǵan.

TMD aıasyndaǵy kópjaqty áskerı yntymaqtastyq ózara senimdi nyǵaıtý, qaýipsizdiktiń bólinbestigi, teń quqyqty tatý kórshilik qatynastardy damytýǵa baǵyttalǵan. Sonymen qatar ol ózge eldermen jáne halyqaralyq uıymdarmen yntymaqtasa otyryp, halyqaralyq beıbitshilikti, óńirlik turaqtylyqty jáne árbir TMD memleketiniń qaýipsiz damýyn qamtamasyz etýge baǵyttalady.

Áskerı saladaǵy yntymaqtastyqtyń uzaq merzimdi maqsattary men mindetterin TMD memleket basshylary keńesi aıqyndap, ár bes jyl saıyn qabyldanatyn áskerı yntymaqtastyq tujyrymdamalarynda kórinis tabady.

Qujat aıasynda qorǵanys mınıstrlikteri, qarýly kúshterdiń bas shtabtary, áskerı basqarý organdary men túrli sanattaǵy áskerı mamandar arasyndaǵy baılanystar men jumys qatynastaryn odan ári jetildirý kózdelgen.

Erekshe nazar ulttyq qarýly kúshterdiń quramynda ortaq áskerı júıelerdi nyǵaıtýǵa aýdarylady. Eń aldymen, biriktirilgen áýe shabýylyna qarsy qorǵanys júıesin, birlesken baılanys júıesin, radıatsııalyq, hımııalyq jáne bıologııalyq jaǵdaıdy baqylaý men baǵalaýdyń biryńǵaı júıesin, biriktirilgen radıolokatsııalyq taný júıesin, sondaı-aq qarýly kúshterge arnalǵan biryńǵaı geoaqparattyq júıeni damytý josparlanyp otyr. Bul ulttyq armııalardyń jaýyngerlik qabiletin jáne áskerı saladaǵy ózara is-qımyl deńgeıin edáýir arttyrýǵa múmkindik beredi.

Buǵan deıin TMD memleket basshylary keńesiniń otyrysynda Qazaqstan Prezıdenti Qasym-Jomart Toqaev klımattyq jáne tehnogendik tótenshe jaǵdaılardy boljaýǵa arnalǵan Óńirlik boljamdaý ortalyǵyn qurýdy usynǵan bolatyn.