TMD sammıtin ótkizýge sebep kóp - sarapshy Saltybaev

ASTANA. QazAqparat - Erteń, 28 qyrkúıek kúni Tájikstan astanasy Dýshanbe qalasynda TMD Memleket basshylary keńesiniń kezekti sammıti ótedi, dep habarlaıdy QazAqparat tilshisi.

QR Tuńǵysh Prezıdenti - Elbasy qory janyndaǵy Álemdik ekonomıka jáne saıasat ınstıtýtynyń dırektory Erjan Saltybaevtyń aıtýynsha, TMD ekonomıkadan bastap geosaıasatqa deıin barlyq máselelerdi talqylaý úshin óte yńǵaıly format. «Buǵan deıin «TMD álsirep barady, atalǵan uıym tek buryńǵy KSRO elderin ajyratýdyń órkenıetti joly ǵana» degen sııaqty áńgimeler bolǵan. Alaıda TMD qurylǵaly beri 27 jyl ótti. Degenmen, atalǵan format jumys istep tur. Demek, oǵan suranys bar. Al suranys bar bolsa, oǵan qatysatyn memleketter óz paıdasyn kórip otyr», - dedi E.Saltybaev QazAqparat tilshisine bergen suhbatynda.

Sarapshynyń sózine qaraǵanda, TMD keńesi qatysýshy memleketterdi óz sheshimderin oryndaýǵa mindettemeıdi. Barlyǵy konsensýs negizinde qaralady.

«Ony «Prezıdentter deńgeıindegi dıalog» dep ataýǵa bolady. Sonyń arqasynda únemi baılanys ustap, kúndelikti máseleler boıynsha shuǵyl sheshim qabyldaýǵa múmkindik bar. Ol jaǵynan TMD óz fýnktsııasyn tolyǵymen oryndap otyr. Sosyn TMD-ǵa múshe keıbir elder Eýrazııalyq ekonomıkalyq odaqqa da kiredi. Demek, odaq aıasyndaǵy máselelerdi qarastyrýǵa da múmkindik bar. Sondyqtan bul óte yńǵaıly format. Al jınalýǵa sebep jeterlik. Qazir geosaıası, áskerı, sanktsııalyq qaýip-qaterler kóp. Sonyń bárin shuǵyl talqylap otyrý qajet. Árıne, prezıdentterge telefonmen sóılese salýǵa da bolatyn edi. Degenmen, osyndaı jıyndarda memleket basshylary «tet-a-tet» kezdesip, barlyq máselelerdi qarastyra alady. Menińshe, TMD keńesi óz fýnktsııasyn tolyǵymen oryndap otyr», - dep atap kórsetti E.Saltybaev.