TMD Parlamentaralyq Assambleıasynyń baıqaýshylary saılaý ýchaskeleriniń jumysy týraly aıtty
«Búgin týra saǵat 7-de saılaý ýchaskeleriniń ashylǵanyn kórdik. Tańerteńnen ýchaskelerde tipti kezek bolǵanyn, saılaýshylar belsendilik tanytyp jatqanyn, merekelik kóńil-kúıdi baıqadyq. Saǵat 7-de saılaý ýchaskesi ashylǵan kezde Qazaqstan Respýblıkasynyń Ánurany shyrqaldy jáne odan ári barlyq rásimder Qazaqstannyń zańnamasyna jáne saılaý ótkizýdiń halyqaralyq standarttaryna tolyǵymen sáıkes keldi», - dedi Dılrabo Mansýrı elordadaǵy Halyqaralyq baıqaýshylarǵa qolǵabys kórsetý ortalyǵyndaǵy brıfıngide.
Onyń aıtýynsha, TMD Parlamentaralyq Assambleıasynyń baıqaýshylary barǵan saılaý ýchaskeleri jaqsy daıyndalǵan. Barlyq talaptar saqtalǵan, daýys berýge, sonyń ishinde múgedekterge de jaǵdaı jasalǵan.
Óz kezeginde TMD Parlamentaralyq Assambleıasy keńesi hatshylyǵynyń basshysy – Bas hatshysy Dmıtrıı Kobıtskıı saılaý komıssııasy músheleriniń daıyndyǵyna joǵary baǵa berdi.
«Ulttyq baqylaýshylar da ózderiniń mindetin laıyqty deńgeıde atqaryp jatyr. Atap aıtqanda, qazirgi ýaqytta biz zań buzýshylyqtardy kórgen joqpyz», - dedi D. Kobıtskıı.
QR Ortalyq saılaý komıssııasynyń málimetine qaraǵanda, saǵat 10:00-degi jaǵdaı boıynsha respýblıkanyń 2 792 962 azamaty bıýlleten aldy. Ol tizimge engizilen azamattardyń 23,37 paıyzyn quraıdy.
