TMD Parlamentaralyq assambleıasynyń baıqaýshylary Qazaqstandaǵy saılaýǵa daıyndyq jumystaryn joǵary baǵalaýda

ASTANA. QazAqparat - TMD Parlamentaralyq assambleıasynyń baıqaýshylary Qazaqstandaǵy saılaýǵa daıyndyq jumystaryn joǵary baǵalaýda. Bul týraly búgin TMD PA baıqaýshylary tobynyń úılestirýshisi Valeh Aleskerov aıtty.

«Bizdiń mıssııamyz óz jumysyn saılaý týraly aqparat jarııa etilgennen keıin birden bastaǵan bolatyn. Mıssııa quramynda 42 adam bar. Olar: TMD PA-ǵa múshe elderdiń parlamentteriniń depýtattary, TMD PA Halyqaralyq demokratııany damytý monıtorıngi ınstıtýtynyń mamandary», - dedi ol.

Sonymen qatar ol elimizdegi saılaýdy uıymdastyrý jumystaryn jiti baqylaýda ustaǵandyqtaryn da atap ótti.

«Biz saılaýǵa daıyndyq júrgizý barysyn baǵaladyq. Atap óterligi, saılaýǵa qatysatyn barlyq partııalarǵa teńdeı múmkindik berilgen jáne buqaralyq aqparat quraldary da barlyq partııalarǵa birdeı qoljetimdi bolǵan. Bizdiń saılaýǵa daıyndyq jumystarynyń joǵary deńgeıde júrgizilgenin atap óte alamyz», - dedi V.Aleskerov.