TMD Parlamentaralyq Assambleıasy dıalogtyń tıimdi alańyna aınaldy - Pavel Kazantsev

ALMATY. QazAqparat- QR Parlamenti Májilisi tóraǵasynyń orynbasary Pavel Kazantsev TMD Parlamentaralyq Assambleıasy Keńesiniń róli týraly aıtty, dep habarlaıdy QazAqparat tilshisi.

Spıker jıynǵa qatysýshylardy TMD PA-nyń 30 jyldyq mereıtoıymen quttyqtady.

«Biz TMD Assambleıasynyń 30 jyldyq mereıtoıyn Almatyda atap ótip jatqanymyzǵa qýanyshtymyz. Búgingi kúni TMD Parlamentaralyq Assambleıasy dıalogtyń tıimdi alańyna aınaldy», - dedi ol.

Pavel Kazantsev Parlamenttik yntymaqtastyq memleketterdiń kópjaqty ózara is-qımyl negizderiniń biri ekenin atap ótti.

«Búginde álemdegi geosaıası ahýaldyń buryn-sońdy bolmaǵan shıelenisýi jaǵdaıynda parlamenttik dıplomatııa janjaldardyń aldyn alý jóninde asa mańyzdy ról atqarady. Ýkraınadaǵy oqıǵalardy erekshe alańdaýshylyqpen baqylap otyrmyz. Qazaqstan orys jáne ýkraın ókilderiniń úıine aınaldy, munda olar ultaralyq tatýlyq pen kelisimdi, sondaı-aq týǵan elderimen jaqsy qarym-qatynasty baǵalaıdy», - dep qosty Pavel Kazantsev.

Májilis tóraǵasynyń orynbasary Qazaqstan 2010 jyly EQYU sammıtin ótkizgen memleket retinde barlyq elder úshin eýrazııalyq qaýipsizdiktiń qaǵıdatyn berik ustanatynyn atap ótti.

«TMD Parlamentaralyq Assambleıasy óńirimiz aldynda turǵan negizgi máseleler boıynsha parlamentshiler arasyndaǵy dıalog, pikir almasý úshin taptyrmas alań boldy jáne solaı bolyp qala beredi. Árıne, biz parlamentarııler óz tarapymyzdan ortaq úıimiz – Eýrazııadaǵy beıbitshilik pen qaýipsizdikti nyǵaıtýǵa bar kúsh-jigerimizdi salýymyz kerek», - dedi P.Kazantsev.

Sonymen qatar, ol Parlamentaralyq Assambleıanyń 30 jylynda jınaqtalǵan zańnamalyq jáne dıplomatııalyq kapıtal halyqtardyń ıgiligi men damýy jolyndaǵy memleketaralyq yntymaqtastyqty odan ári ilgeriletýdiń kilti ekenin jetkizdi.

Aıta keteıik, Almatyda TMD Parlamentaralyq Assambleıasynyń mereıtoılyq otyrysy ótip jatyr.