TMD ómirsheń ári asa qajetti uıymdardyń biri bolyp qala beredi - Qaırat Ábdirahmanov

ASTANA. QazAqparat - QR Syrtqy ister mınıstri Qaırat Ábdirahmanov áriptesi RF Syrtqy ister mınıstri Sergeı Lavrovpen bolǵan kezdesýde qandaı baǵytta kelissózder júrgizilgenin atady, dep habarlaıdy «QazAqparat»HAA tilshisi.

«Jańa ǵana meniń áriptesim ári dosym Sergeı Vıktorovıchpen birqatar kelissózderdi aıaqtadyq. Kelissózder dástúrli túrdegi iskerlik ári pikir almasý mazmunynda órbidi. Biz Qazaqstan men Reseı prezıdentteriniń kezdesýleri barysynda mańyzǵa ıe bolatyn suraqtardy ortaq talqyǵa saldyq. Buǵan deıingi eki eldiń yntymaqtastyǵyn qorytyndylap, qazirgi jaǵdaı týraly jáne qarym-qatynasty keleshekte damytý josparyn talqyladyq. Ekijaqty qarym-qatynas turǵysynda Chelıabi qalasynda ótetin Qazaqstan men Reseı elderiniń  14-shi óńiralarlyq seriktestik forýmynyń daıyndyǵyna nazar aýdardyq», - deıdi QR Syrtqy ister mınıstri.

Qaırat Ábdirahmanov sonymen birge, kelesi aptada ótetin TMD elderi basshylarynyń Keńesi týraly aıtyp ótti.

«Biz Qazaqstanda TMD HHІ ǵasyrda ómirsheń ári qajettiligi óte joǵary uıym bolyp qala beretinine senimdimiz. 2015 jyly Býrabaıda ótken beıresmı sammıtte Nazarbaev uıymnyń jumysyn kúsheıtý úshin yntymaqtastyqty transformatsııalaý, ıaǵnı sáıkes kelmeıtin mindetterdi alyp tastaý qajettigin usynǵan edi. Bul ózgerister uıymnyń jumysyn kúsheıte túsetini daýsyz. Búgingi tańda biz Qazaqstan basshysynyń usynǵan bastamasynyń naqty nátıjelerine jaqyndap kele jatyrmyz dep aıta alamyz», - deıdi ol.