TMD-nyń metro qurylysshylary Almatyda bas qosady
ALMATY. 3 maýsym. QazAqparat /Erbol Azanbek/ - Maýsymnyń 9-y kúni Almatyda Halyqaralyq «Metro» qaýymdastyǵy músheleriniń konferentsııasy men dırektorlar keńesiniń otyrysy ótedi. Bul týraly "Metropolıten" MKK baspasóz qyzmeti habarlady.
Basqosýdyń basty maqsaty - tájirıbe almasý, aldyńǵy qatarly úzdik tehnologııalarmen tanysý. Jıynǵa halyqaralyq «Metro» qaýymdastyǵyna múshe 20-ǵa jýyq metro qurylysyn salýshy kompanııanyń basshylary keledi.
Konferentsııa barysynda jolaýshylardyń qaýipsizdigi, jańa tehnologııalar men tehnıkalyq quraldardy engizý máselesi talqylanady. Sondaı-aq qonaqtar Almaty metrosynda bolyp, onyń jumysymen tanysady.
QazAqparat anyqtamasy: Halyqaralyq «Metro» qaýymdastyǵy 1992 jyly aqpan aıynda, KSRO-nyń qulaýynan soń metro qurylysy salasy mamandarynyń tájirıbe almasý, ortaq strategııalyq baǵytyn jasaý maqsatynda quryldy. Qazirgi kezde TMD-daǵy birqatar vagon quraý, jóndeý zaýyttary men Reseıdiń Máskeý, Peterbýrg, Samara, Ekaterınbýrg, Novosibir, Nıjegorod, Grýzııadaǵy Tbılısı, Ózbekstandaǵy Tashkent, Ázirbaıjandaǵy Baký, Armenııadaǵy Erevan, Ýkraınadaǵy Kıev, Harkov, Dneprepetrovsk, Belorýssııadaǵy Mınsk, Tatarstandaǵy Qazan, Qazaqstandaǵy Almaty metrolary qaýymdastyqqa múshe. Qaýymdastyq qyzmeti - TMD elderi metrolary arasynda baılanysty nyǵaıtý, tájirıbe almasý, tehnıkalyq- normatıvtik qujattardy jasaý, metro qurylysy men qyzmetine qatysty zań bastamalary men zań normalaryn talqylaýǵa baǵyttalǵan.
