TMD-ny qarqyndy, bolashaqqa nyq qadam basqan uıym retinde nyǵaıta alatynymyzǵa senimdimin – Prezıdent
ASTANA. KAZINFORM – Qazaqstan Dostastyqtyń halyqaralyq baılanystaryn jandandyrýdy dáıekti túrde qoldaıdy, dedi búgin Qazaqstan Prezıdenti Qasym-Jomart Toqaev TMD memleketteri basshylary keńesiniń otyrysynda sóılegen sózinde.
-Maqsatymyz ortaq – Dostastyqty jasampazdyq pen órleýdiń, jańa ıdeıalar men múmkindikterdiń keńistigine aınaldyrý-, deı kele Prezıdent TMD-nyń álemdik arenadaǵy abyroı-bedelin nyǵaıtýdyń mańyzyna toqtaldy.
–Esterińizde bolsa, 2023 jyly Qazaqstan Respýblıkasynyń usynysy boıynsha TMD-nyń Baıqaýshylary men Seriktesi ınstıtýty bekitildi. Bul bastamanyń alǵashqy nátıjeleri baıqala bastaǵanyn rızashylyqpen atap ótkim keledi. Búgin Shanhaı yntymaqtastyq uıymyna Baıqaýshy mártebesin berý týraly sheshim qabyldaımyz. Bul oqıǵa Eýrazııanyń aımaqtyq qurylymdar yqpaldastyǵy tarıhynyń jańa paraǵyn ashady. Budan bólek, Máskeýdegi sammıtte Qazaqstan usynǵan «TMD plıýs» formatynda qarym-qatynas ornatýdy qoldaımyz. Atalǵan qadam TMD-nyń halyqaralyq arenadaǵy rólin nyǵaıta túsedi, – dedi Memleket basshysy.
Sóz sońynda Qasym-Jomart Toqaev Keńestiń kelesi jyly Uıymǵa Túrikmenstannyń tóraǵalyq etý jónindegi sheshimine qoldaý bildirdi.
– Túrikmenstan Prezıdenti Serdar Gýrbangýlyevıch Berdimuhamedovti osy mańyzdy ári qurmetti mıssııany qolǵa alýymen quttyqtaımyn. Maqsatymyz ortaq – Dostastyqty jasampazdyq pen órleýdiń, jańa ıdeıalar men múmkindikterdiń keńistigine aınaldyrý. Birlesken kúsh-jiger arqyly TMD-ny qarqyndy, tıimdi ári bolashaqqa nyq qadam basqan halyqaralyq uıym retinde nyǵaıta alatynymyzǵa senimdimin, – dedi Memleket basshysy.
Otyrysta Tájikstan Prezıdenti Emomalı Rahmon, Ázerbaıjan Prezıdenti Ilham Álıev, Armenııa Premer-mınıstri Nıkol Pashınıan, Belarýs Prezıdenti Aleksandr Lýkashenko, Qyrǵyzstan Prezıdenti Sadyr Japarov, Reseı Prezıdenti Vladımır Pýtın, Túrikmenstan Prezıdenti Serdar Berdimuhamedov, Ózbekstan Prezıdenti Shavkat Mırzıeev, TMD Bas hatshysy Sergeı Lebedev sóz sóıledi.
Osyǵan deıin Qazaqstan Prezıdentiniń TMD memleketteri basshylary keńesiniń otyrysynda sóz sóılegeni týraly jazdyq.