TMD memleketteriniń Úkimet basshylary Uly Jeńistiń 70 jyldyǵyna arnalǵan sharalardyń josparyn maquldady
SANKT-PETERBOR. 21 qarasha. QazAqparat - Sankt-Peterborda TMD memleketteri Úkimet basshylary keńesiniń kezekti otyrysy ótti.
«Úkimet basshylary 1941-1945 jyldar aralyǵyndaǵy Uly Otan soǵysyndaǵy keńes halqy jeńisiniń 70 jyldyǵyn toılaýǵa baılanysty negizgi sharalardyń daıyndyǵy boıynsha jobanyń josparyn maquldady», - dep habarlady TMD Atqarý komıtetiniń baspasóz qyzmetinen.
Sonymen birge ózge de birqatar qujattardyń jobalary boıynsha sheshim qabyldandy: 2009 jyldyń 20 qarashasynan Táýelsiz Memleketter Dostastyǵy elderindegi taýarlardyń shyǵý jerin anyqtaıtyn erejeler týraly kelisimge ózgerister engizý týraly hattamaǵa qol qoıyldy, 2020 jylǵa deıin týrızm salasynda TMD-ǵa múshe memleketter yntymaqtastyǵyn damytý Strategııasy, TMD-ǵa múshe memleketterdiń qaıta jańartylǵan energııa kózderin paıdalaný salasyndaǵy Tujyrymdamasy jáne ony júzege asyrýdaǵy birinshi kezektegi sharalar jospary bekitildi.
Dostastyq elderiniń arasynda aqparattyq qaýipsizdikpen qamtamasyz etý salasyndaǵy Kelisimge, ǵylymı-tehnıkalyq aqparat salasyndaǵy mamandardy daıyndaý, kásibı daıyndyqtan ótkizý men qaıta daıarlaý memleketaralyq júıesin qurý men damytý Tujyrymdamasy jáne basqa da mańyzdy qujattarǵa qol qoıyldy.
2020 jylǵa deıin TMD-ǵa múshe memleketterdiń energııa resýrstaryn tutyný jáne óndirý jospary maquldandy.
Budan bólek, Dostastyqtyń bıýdjettik-qarjylaı jáne uıymdastyrý máseleleri boıynsha máseleleri qarastyryldy.
Úkimet basshylary keńesiniń kelesi otyrysy 2014 jyly 30 mamyrda Kıev (Ýkraına) qalasynda ótkizý josparlanyp otyr.
