TMD memleketteri áskerı ózara is-qımyldy kúsheıtý jónindegi qujattarǵa qol qoıdy
ASTANA. KAZINFORM – Táýelsiz Memleketter Dostastyǵyna múshe memleketterdiń qarýly kúshteri shtab bastyqtary komıtetiniń otyrysyna Ázerbaıjan, Belarýs, Qazaqstan, Qyrǵyzstan, Reseı, Tájikstan, Túrikmenstan jáne Ózbekstan áskerı vedomstvolarynyń ókilderi qatysty, dep habarlaıdy QR Qorǵanys mınıstrliginiń baspasóz qyzmeti.
Plenarlyq otyrys bastalmas buryn áskerı delegatsııalar basshylarynyń ekijaqty kezdesýleri ótti. Sondaı-aq qatysýshylar «Otan qorǵaýshylar» alańyndaǵy Máńgilik alaýǵa gúl shoqtaryn qoıý rásimine qatysty.
Otyrysta taraptar álemdegi jáne Ortalyq Azııa óńirindegi áskerı-saıası ahýaldy, kópjaqty áskerı yntymaqtastyqty damytý jáne Dostastyq elderiniń qarýly kúshteri arasyndaǵy ózara is-qımyldy nyǵaıtý máselelerin talqylady.
Qazaqstan Respýblıkasy Qorǵanys mınıstriniń birinshi orynbasary – Qarýly Kúshter Bas shtabynyń bastyǵy general-leıtenant Qanysh Ábýbákirovtyń aıtýynsha, Qazaqstan ásker qurylymyn damytýdaǵy tájirıbesimen jáne áskerdiń jaýyngerlik qabiletin arttyrýǵa baǵyttalǵan jańa tásilderimen bólisti.
Kezdesý barysynda radıatsııalyq, hımııalyq jáne bıologııalyq qorǵanys salasyndaǵy yntymaqtastyqty damytý, áskerı avıatsııa ushýlarynyń qaýipsizdigin qamtamasyz etý máseleleri de qaraldy.
Sonymen qatar joǵary tehnologııalyq qarý-jaraq pen áskerı tehnıkany qoldanýdyń zamanaýı tájirıbesin zerdeleý jaıy sóz boldy. Qatysýshylar áskerı zymyrandar men artıllerııany jaýyngerlik qoldaný, sondaı-aq nysandar men aýmaqtardy mınadan tazartý mindetterine erekshe nazar aýdardy.
– Áskerı saladaǵy yntymaqtastyǵymyzdyń deńgeıi turaqty túrde keńeıip keledi. Bul ulttyq qarýly kúshterdiń áleýetin nyǵaıtýǵa jáne Dostastyq memleketteriniń qaýipsiz damýyn qamtamasyz etýge yqpal etedi, – dep qorytyndylady sózin general-leıtenant Qanysh Ábýbákirov.
Kezdesý qorytyndysy boıynsha TMD-ǵa qatysýshy memleketterdiń qorǵanys mınıstrleri keńesiniń hatshysy general-leıtenant ıÝrıı Dashkın Dostastyq keńistigindegi áskerı ózara is-qımyldyń mańyzdylyǵyn atap ótti.
Onyń aıtýynsha, bul yntymaqtastyq qarýly kúshter arasyndaǵy úılestirýdi kúsheıtýge jáne óńirlik qaýipsizdikti saqtaýǵa baǵyttalǵan.
Іs-shara sońynda taraptar TMD-ǵa qatysýshy memleketterdiń qarýly kúshteri arasyndaǵy yntymaqtastyqty odan ári damytý jáne óńirdegi turaqtylyq pen qaýipsizdikti nyǵaıtý jónindegi kelisimderdi bekitetin qorytyndy qujattarǵa qol qoıdy.
Osyǵan deıin TMD elderimen radıatsııalyq monıtorıng derekterimen almasý týraly zańǵa qol qoıylǵany týraly jazdyq.
