TMD memleketteri arasynda alıment óndirý tártibi jeńildeıdi

ASTANA. KAZINFORM – Búgin Parlament Májilisiniń jalpy otyrysynda «1993 jylǵy 22 qańtardaǵy Azamattyq, otbasylyq jáne qylmystyq ister boıynsha quqyqtyq kómek pen quqyqtyq qatynastar týraly konventsııaǵa ózgerister engizý týraly hattamany ratıfıkatsııalaý týraly» Zań qabyldandy.

- Hattama TMD memleketteri arasynda sot aktilerin ózara taný tetigin keńeıtedi. Endi mundaı aktiler qataryna kámeletke tolmaǵan balalarǵa alıment óndirý týraly sot buıryqtary tikeleı engiziledi. Bul – mańyzdy qadam. Sebebi sot buıryǵy – jedel quqyqtyq qural. Ol uzaq sot protsesin ótkizbeı shyǵarylady. Sondaı-aq, balanyń quqyǵyn ýaqytyly qorǵaýǵa múmkindik beredi. Alaıda boryshker basqa memlekette bolǵan jaǵdaıda, sheshim tek qaǵaz júzinde qalyp qoıýy múmkin. Osy máseleni Hattama sheshedi, - dedi Ádilet mınıstri Erlan Sársembaev.

Atalǵan ratıfıkatsııadan keıin:

- sot buıryǵy Konventsııa aıasynda tikeleı tanylady;

- rásim túsinikti ári boljamdy bolady;

- sonymen qatar, oryndaý – naqty qamtamasyz

etiledi.

- Jarııalanǵan jańa Konstıtýtsııa jobasynda adam, onyń ómiri, quqyqtary men bostandyqtary memlekettiń eń joǵary qundylyǵy retinde aıqyndalǵan. Ata Zańymyzdyń jobasynda erekshe nazar myna qaǵıdattarǵa aýdaryldy: ádilettilik prıntsıpin nyǵaıtý, sot sheshimderiniń naqty oryndalýyn qamtamasyz etý, balanyń múddesine basymdyq berý, sondaı-aq, memlekettiń quqyq qorǵaý tıimdiligi úshin jaýapkershiligin arttyrý. Hattamany ratıfıkatsııalaý osy qundylyqtarmen tolyq úndesedi. Konstıtýtsııalyq damýdyń jańa modeli deklaratsııalarǵa emes, naqty jumys isteıtin tetikterge negizdeledi. Quqyqty qorǵaý – bul tek norma emes. Bul – oryndalý. Munymen qosa, jańa konstıtýtsııalyq model quqyqtyq aıqyndyq qaǵıdatyn kúsheıtedi. Azamat mynany bilýi tıis: eger sot aktisi bar bolsa – ol oryndalady. Búginde transshekaralyq alımenttik isterde belgili bir quqyqtyq olqylyq bar. Hattama osy olqylyqty joıady. Ol sot buıryqtaryn tanýǵa jáne oryndaýǵa jatatyn aktiler tizbesine tikeleı engizedi, - dedi mınıstr.

Onyń sózine qaraǵanda, qazir shetelde jumys istep júrgen Qazaqstan azamattary bar jáne olardyń keıbiri otbasyn quryp jatyr. Bul rette, transshekaralyq otbasylyq daýlar sany artyp keledi.

- Mundaı isterdegi eń aýyr másele – ajyrasý emes. Eń aýyr másele –alımenttiń tólenbeýi. Memleket syrttaı baqylaýshy bola almaıdy. Biz halyqaralyq yntymaqtastyq arqyly ıýrısdıktsııamyzdan tys jerde de jumys isteıtin tetik qurýǵa mindettimiz. Sońǵy 5 jylda mundaı ótinishterdiń sany 102-ge jetti (Qazaqstan sottarymen alımentterdi óndirip alý týraly sheshimderdi taný jáne olardy oryndaýǵa ruqsat berý jónindegi ótinishhattar qaraldy)... Hattamany ratıfıkatsııalaý balanyń quqyqtaryn qorǵaýdy kúsheıtedi, taraptar múddesiniń teńgerimin qamtamasyz etedi, sot aktileriniń oryndalýyn arttyrady, konstıtýtsııalyq jańarý baǵytyna sáıkes keledi, sonymen qatar, azamattardyń memleketke degen senimin nyǵaıtady, - dedi vedomstvo basshysy.

Aıta keteıik, Ádilet mınıstrliginiń derekterine sáıkes, 2025 jyly jeke sot oryndaýshylarynyń óndirisinde alımenttik mindettemelerge qatysty 317,9 myń is bolǵan.