TMD Memleket basshylary keńesiniń kezekti otyrysy Ashhabadta ótedi - QR SІM
ASTANA. QazAqparat - 2019 jyly TMD-ǵa tóraǵalyqty Túrikmenstan atqarady. Bul týraly QR Syrtqy ister mınıstrliginde ótken brıfıng barysynda QR SІM resmı ókili Aıbek Smadııarov málim etti, dep habarlaıdy QazAqparat tilshisi.
«28 qyrkúıekte Qazaqstan Prezıdenti Nursultan Nazarbaev Tájikstan Respýblıkasynyń tóraǵalyǵymen Dýshanbede ótken TMD Memleket basshylary keńesiniń kezekti otyrysyna qatysty. Kezdesý barysynda TMD memleketteriniń basshylary dostastyq aıasyndaǵy ózara is-qımyl jóninde pikir almasyp, uıym qyzmetiniń tıimdiligin arttyrý máselelerin qarastyrdy. Mádenı-gýmanıtarlyq salada TMD memleketteriniń basshylary Shyńǵys Aıtmatovtyń 90 jyldyǵyna arnalǵan jáne Dúnıejúzilik Kóshpendiler oıyndary týraly birlesken málimdemeler qabyldady», - deıdi Aıbek Smadııarov.
Onyń aıtýynsha, Ekinshi dúnıejúzilik soǵystaǵy jeńistiń jetpis jyldyǵyn toılaý 2020 jyly ótedi.
«Osyǵan oraı Memleket basshylary sammıt barysynda uıymdastyrýshylyq sharalardy, sondaı-aq Otan qorǵaýshylardy máńgi este qaldyrý sharalary boıynsha 1941-1945 jyldardaǵy Ekinshi dúnıejúzilik soǵys qatysýshylary men olarǵa teńestirilgen adamdardy áleýmettik qorǵaýdy kózdegen birlesken is-sharalar josparyn qabyldady. Sondaı-aq qabyldanǵan sheshimge sáıkes 2021 jyly «TMD Mádenı astanalary» atty memleketaralyq baǵdarlama Tájikstan Respýblıkasynda iske asyrylatyn bolady», - dedi ol.
Aıbek Smadııarov sondaı-aq, otyrys barysynda Memleket basshylary eki halyqaralyq shartqa, TMD-ǵa qatysýshy memleketterdiń ǵarysh keńistigin beıbit maqsattaǵy zertteý jáne paıdalaný salasyndaǵy yntymaqtastyq týraly konventsııaǵa jáne aqparattyq tehnologııa salasyndaǵy yntymaqtastyq týraly kelisimge qol qoıǵan.
«2019 jyly TMD-ǵa tóraǵalyqty Túrikmenstan atqarady. Osyǵan baılanysty TMD Memleket basshylary keńesiniń kezekti otyrysy 2019 jyly 19 qazanda Ashhabad qalasynda ótedi», - dedi Aıbek Smadııarov.
