TMD Memleket basshylary birqatar qujattardy qabyldady
TMD Atqarýshy komıtetiniń tóraǵasy Sergeı Lebedevtiń aıtýynsha, keńes músheleri aldymen TMD-ny damytýǵa qatysty ózekti máselelerdi talqylap shyqty. Osydan keıin 2019 jyldaǵy Túrikmenstannyń tóraǵalyǵyn qoldady. Alaıda kelesi jyly taǵy eki teń tóraǵa bolady. Olar - Tájikstan men Ózbekstan. Túrikmenstannyń usynysy boıynsha TMD Memleket basshylary keńesiniń kelesi sammıtin 2019 jyly 11 qazanda Ashhabadta ótkizý týraly sheshim qabyldandy. «Kadrlyq máselelerden bólek barlyq memleketter qalǵan qujattardy talqylaýsyz qol qoıýǵa kelisti», - dep atap kórsetti S.Lebedev.
Sammıttiń qaraýyna birneshe qujat shyǵaryldy. Sonyń ishinde eki halyqaralyq kelisim bar. Birinshisi - Táýelsiz Memleketter Dostastyǵyna múshe memleketterdiń aqparattyq tehnologııalyq salasyndaǵy qylmystarmen kúres jónindegi kelisim, ekinshisi - TMD-nyń ǵarysh keńistigin beıbit maqsatta paıdalaný jáne zertteýge arnalǵan kelisim. Budan bólek, TMD memleket basshylary keńesiniń sheshimderine qatysty birneshe qujat bar. Atap aıtqanda, Túrikmenstannyń kelesi jyldaǵy tóraǵalyǵy, Uly Jeńistiń 75-jyldyǵyna daıyndyq sharalary, 2021 jyly Tájikstanda «Dostastyqtyń mádenı astanalary» atty memleketaralyq baǵdarlamany iske asyrý, 2021 jyldy TMD boıynsha sáýlet jáne qara qurylysy jyly retinde jarııalaý, 2019-2023 jyldar aralyǵynda qylmyspen kúres sharalaryn birlesip júrgizýdiń memleketaralyq baǵdarlamasy, TMD-ǵa múshe memleketter qorǵanys mınıstrleriniń Keńesi týraly erejege ózgerister engizý, TMD-ǵa múshe memleketterdiń Terrorızmge qarsy ortalyq týraly erejeni tolyqtyrý, keńestiń keıbir sheshimderin toqtatý, Terrorızmge qarsy ortalyqtyń basshysy týraly qujat, áýe qorǵanysy jónindegi úılestirý komıtetiniń tóraǵasy týraly qujat, TMD-ǵa múshe memleket basshylarynyń Dúnıejúzilik kóshpendiler oıyndary týraly málimdemesi, sondaı-aq, jazýshy Shyńǵys Aıtmatovtyń 90-jyldyǵyna arnalǵan birlesken málimdeme bar.
Aıta keteıik, keshe QR Prezıdenti Nursultan Nazarbaev Dýshanbege keldi. Memleket basshysy áýejaıdan birden «Koxı Somon» rezıdentsııasyna baryp, Tájikstan prezıdenti Emomalı Rahmonmen kezdesti.
«QazAqparat» agentigi TMD-nyń basty organy - Prezıdentter keńesiniń kezekti otyrysy aldynda buǵan deıingi jıyndarǵa sholý jasap, qabyldanǵan sheshimderdi pysyqtap shyqqan bolatyn. Al Aqordanyń baspasóz qyzmeti tarıhı mańyzy bar fotosýretterdi usyndy.
