TMD keńistiginde alıment boıynsha sot buıryqtaryn taný tetigi engiziledi
ASTANA. KAZINFORM — Búgin Májilistiń jalpy otyrysynda «2002 jylǵy 7 qazandaǵy Azamattyq, otbasylyq jáne qylmystyq ister boıynsha quqyqtyq kómek pen quqyqtyq qatynastar týraly konventsııaǵa ózgerister engizý týraly hattamany ratıfıkatsııalaý týraly» Zań qabyldandy.
- Jańa ǵana biz 1993 jylǵy Mınsk konventsııasy https://kaz.inform.kz/news/tmd-memleketter-arasinda-aliment-ondru-tartb-zhenldeyd-253f45/ tetikteri arqyly balanyń quqyqtaryn qorǵaý máselesin qarastyrdyq. Alaıda naqty bir otbasy úshin konventsııanyń ataýy mańyzdy emes. Mańyzdysy – sot sheshiminiń naqty jumys isteýi. Bala úshin memleketterdiń qaı shart aıasynda yntymaqtasatyny báribir. Oǵan alımenttiń ýaqytyly túsýi mańyzdy. Qarapaıym azamat úshin sot aktisiniń oryndalýy basqa memleket qandaı konventsııany qoldanatynyna táýeldi bolmaýy tıis. Osyǵan baılanysty sizderdiń qaraýlaryńyzǵa «2002 jylǵy 7 qazandaǵy Azamattyq, otbasylyq jáne qylmystyq ister boıynsha quqyqtyq kómek jáne quqyqtyq qatynastar týraly Konventsııaǵa ózgerister engizý týraly» hattamany ratıfıkatsııalaý máselesi usynylady, - dedi qujat boıynsha negizgi baıandama jasaǵan Ádilet mınıstri Erlan Sársembaev.
Onyń aıtýynsha, búginde TMD keńistiginde eki sharttyq negiz qoldanylady: 1993 jylǵy Mınsk konventsııasy, 2002 jylǵy Kıshınev konventsııasy. Keıbir memleketter birinshisin, al keıbiri ekinshisin qoldanady. Eger ózgerister tek bir shartqa engizilse, quqyqtyq qorǵaý tolyq bolmaıdy. Bala úshin bul – táýekel. Al, azamat úshin – belgisizdik. Usynylyp otyrǵan Hattama osy aıyrmashylyqty joıady. Ol alıment boıynsha sot buıryqtaryn taný tetigin ekinshi kelisimsharttyq negizge de qoldanýǵa múmkindik beredi.
- Bul memleketter arasynda qaı Konventsııa qoldanylatynyna qaramastan, alıment óndirý týraly sot buıryǵy biryńǵaı qaǵıdalar boıynsha tanylyp, oryndalatynyn bildiredi. Bul – júıelilik. Bul – boljamdylyq. Bul – teń qorǵalý degen sóz, - dedi ol.
Mınıstrdiń aıtýynsha, qujat boryshkerdiń tıisinshe habardar etilgenin rastaýdy talap etedi. Eger buıryq tapsyrylmasa – ony tanýdan bas tartylýy múmkin. Osylaısha qorǵaný quqyǵy saqtalady.
- Biz balany qorǵaımyz. Biraq qatań quqyqtyq aıada áreket etemiz. Jańa Konstıtýtsııa jobasy adamdy jáne onyń quqyqtaryn memlekettiń eń joǵary qundylyǵy retinde aıqyndaıdy. Bul qaǵıdat barlyq halyqaralyq tetikterde birdeı jumys isteýi tıis. Búgin biz jaı ǵana qujatty ratıfıkatsııalap otyrǵan joqpyz. Biz quqyqtardy qorǵaýdyń tutas, kemshiliksiz jáne aıyrmashylyqsyz júıesin qalyptastyryp otyrmyz, - dedi Erlan Sársembaev.
Osyǵan deıin TMD memleketteri arasynda alıment óndirý tártibi jeńildeıtini týraly jazdyq.