TMD keńistiginde saılaý úderisteri demokratııalanyp keledi - TMD mıssııasy baıqaýshylarynyń basshysy
ANA. 31 naýryz. QazAqparat /Aıdar Ospanalıev/ - TMD keńistiginde saılaýdy demokratııalandyrý úrderisi júrip jatyr. Bul birinshi kezekte Qazaqstanǵa qatysty aıtylatyn másele.
Bul týraly búgin Ortalyq saılaý komıssııasynyń tóraǵasy Qýandyq Turǵanqulovpen kezdesý barysynda TMD mıssııasy baıqaýshylarynyń basshysy Sergeı Lebedev málim etti.
Onyń sózine qaraǵanda, TMD mıssııasy baıqaýshylarynyń qyzmetindegi basty ustanym - obektıvtilik. «Biz kóptegen memleketterde baıqaýshy boldyq. Olardyń barlyǵyndaǵy jaǵdaı keremet dep aıta almaımyn. Al kemshilikterge keletin bolsaq, ol tek TMD memleketterinde ǵana oryn alyp otyrǵan joq. Biz TMD-ǵa múshe eldermen qatar Batys Eýropa men AQSh-ta da qyzmet ettik. Demokratııasy damyǵan degen bul elderdiń ózinde kóptegen kemshilikter bar. Tipti osy elderde baıqaýshylardy saılaýǵa jibermeı qoıǵan kezderdiń de kýási boldyq»,-dedi mıssııa basshysy.
Onyń aıtýynsha, TMD mıssııasy baıqaýshylarynyń basty maqsaty ózderi baıqaýshy bolǵan elderdiń zańdaryna taldaý jasaý bolyp tabylady. «Osy sebepti biz Qazaqstanǵa kelerdiń aldynda-aq osy eldiń saılaý úrdisterin retteıtin zańnamalarmen jan-jaqty tanysyp shyqtyq. Men osy rette aıtaıyn degenim, biz tipti bul baǵytta Batys elderiniń birqataryn basyp ozdyq dep aıta alar edim»,-dedi S.Lebedev.
