TMD keńisitigindegi lańkestik áreketter sııaqty oqıǵalardy buqaralyq aqparat quraldary qalaı nasıhattaýlary kerek degen másele tóńireginde beınekópir uıymdastyrdy
ASTANA. 21 sáýir. QazAqparat /Aıdar Ospanalıev/ - Búgin buqaralyq aqparat quraldarynyń ókilderi «RIA Novostı» aqparat agenttiginiń Ortalyq Azııadaǵy aýmaqtyq ókildigi «Bilý nemese bilmeý quqyǵy»
atty taqyrypta uıymdastyrǵan mýltımedııalyq beınekópirdi tamashalady.
Atalmysh shara Máskeý-Kıev-Erevan-Astana formatynda ótti. «Sáýirdiń 11-i kúni TMD aýmaǵynda lańkestik áreket oryn aldy. Mınsk metrosynda lańkestik áreketterdiń saldarynan kóptegen adamdar mert boldy. Osydan soń qoǵam aldynda osyndaı jaǵdaıdy jýrnalıster qaýymy qalaı kórsetýi kerek degen suraq týyndady.
Biz aqparat ǵasyrynda ómir súrip jatyrmyz. Qazirgi zamanda aqparat quraldary úlken ról atqarady. Búginde televıdenıe, radıo, ınternetsiz álemdi kózge elestetý múmkin emes. Osyǵan qaraı elde qandaı da bir jaǵdaı bola qalǵanda oqıǵa ornyna alǵashqylardyń biri bolyp jetetin osy jýrnalıster qaýymy. Al osy jýrnalıster bolǵan oqıǵany túgeldeı tizip bere berýlerine bolady ma? degen saýal týyndap otyrǵany ras», - deıdi sharany uıymdastyrýshylar.
Osyǵan oraı beınekópir barysynda sharaǵa qatysýshy elderdiń jýrnalıst, psıholog, áskerı salalardyń sarapshy mamandary óz oılarymen bólisti.
