TMD elderiniń aqparat agenttikteri týrızmdi damytý baǵytyndaǵy yntymaqtastyqty kúsheıtedi
ASTANA. KAZINFORM — TMD músheleriniń týrıstik áleýetin nyǵaıtý boıynsha jańa tetikter engizilýi múmkin. Bul másele Ystyqkólde ótken TMD Memlekettik aqparat agenttikteri basshylary keńesiniń XXXV otyrysynda keńinen talqylandy.
Jıynda Kazinform agenttiginiń basqarýshy dırektory Naǵashybek Aldan aqparat agenttikteri arasynda týrıstik kontent almasýdy júıeli túrde jolǵa qoıýdy usyndy. Sonyń ishinde osy baǵytqa jaýapty úılestirýshilerdi belgileý qajettigin atap ótti.
— Árqaısymyzdyń aqparattyq resýrstarymyzdyń múmkindigi zor jáne óz elderimizdegi jetekshi medıaresýrstardyń biri bolyp sanalady. Bıyl Qazaqstan boıynsha aýqymdy jumys júrgizdik. Atap aıtqanda, tilshilerimiz týrıstik óńirlerge baryp, qyzmetterdiń quny, ınfraqurylym jáne demalys jaǵdaılary t. b. taqyryptarda jan-jaqty materıaldar ázirledi. Biz bul kontentti áriptesterimizben bólisýge daıynbyz. Týrızm taqyrybyna jaýapty jeke úılestirýshini belgileý mundaı jumystardy júıeli ári tıimdi etýge múmkindik beredi, — dedi Naǵashybek Aldan.
Al TASS bas dırektory Andreı Kondrashov ulttyq aqparat agenttikteriniń atalǵan baǵyttaǵy ózara is-qımylyn jandandyrý ıdeıasyn qoldady. Onyń aıtýynsha, TMD elderiniń týrıstik áleýeti zor bolǵanymen, keı máseleler boıynsha kórshiles memleketterdiń turǵyndaryna áli de jetkilikti deńgeıde aqparat berilip jatqan joq.
— Búginde biz bir-birimiz úshin buǵan deıin ózimiz de bilmegen orasan zor týrıstik múmkindikterdi ashyp jatyrmyz. Árqaısymyzdyń elimizdegi týrıstik oryndarǵa kórshiles halyqtardyń qyzyǵýshylyǵy artyp keledi. Ondaı jerlerdiń qataryna tarıhı nysandar da, zamanaýı týrıstik klasterler de kiredi. Bul saladaǵy jumysty odan ári kúsheıtip, elderimizdegi týrıstik oryndar jaıynda barynsha keń aýqymda aqparat berýimiz kerek, — dedi Andreı Kondrashov.
Qyrǵyz ulttyq «Kabar» aqparat agenttiginiń dırektory Mederbek Shermetalıev te bul taqyryptaǵy ustanymyn málimdedi. Onyń sózinshe, Qyrǵyzstan VI Dúnıejúzilik kóshpendiler oıyndaryna daıyndalyp jatyr. Shermetalıev TMD elderiniń aqparat agenttikterin aldaǵy halyqaralyq is-sharany kórsetýde aqparattyq qoldaý bildirýge shaqyrdy.
— Dúnıejúzilik kóshpendiler oıyndary — halyqaralyq mańyzy bar aýqymdy shara. Biz úshin onyń Qyrǵyzstannan tys jerlerde keńinen nasıhattalýy óte ózekti másele. TMD elderiniń aqparat agenttikteri atalǵan doda týraly jańalyqtardy, reportajdardy jáne basqa da materıaldardy turaqty túrde jarııalap otyrsa, biz buǵan óte rıza bolar edik, — dedi Mederbek Shermetalıev.
Jıynǵa qatysýshylar týrıstik kontentti júıeli túrde almasyp otyrýdyń tıimdiligine toqtaldy. Ondaı áriptestik TMD elderiniń turǵyndaryn jańa týrıstik baǵyttar men nysandar týraly keńinen habardar etýge múmkindik beredi. Sonyń arqasynda týrıstik aǵyn da artady.
Aıta keteıik, buǵan deıin TMD memleketteri áskerı ózara is-qımyldy kúsheıtý jónindegi qujattarǵa qol qoıǵanyn jazǵanbyz.
