TMD elderinde eńbek mıgranttaryn medıtsınalyq saqtandyrýdyń jańa tásili ázirlenip jatyr
ASTANA. KAZINFORM – TMD shtab-páterinde sarapshylar tobynyń qosymsha otyrysy ótti. Onda Táýelsiz Memleketter Dostastyǵyna múshe memleketter arasyndaǵy eńbek mıgranttary men olardyń otbasy múshelerin medıtsınalyq saqtandyrý boıynsha yntymaqtastyq týraly kelisim jobasy maquldandy, dep habarlaıdy Kazinform BELTA agenttigine silteme jasap.
Otyrysqa Belarýs, Ázerbaıjan, Qazaqstan, Qyrǵyzstan, Reseı, TMD Atqarý komıteti men TMD PAA Hatshylyǵynyń ókilderi qatysty.
TMD Atqarý komıteti baspasóz qyzmetiniń habarlaýynsha, sarapshylar kelisim jobasyna birqatar memleketten kelip túsken eskertýler men usynystardy qarap, ótken talqylaýdy eskere otyryp, kópshilik daýyspen maquldady. Qujatty belgilengen tártippen TMD Úkimet basshylary keńesiniń qaraýyna engizý týraly sheshim qabyldandy.
Qujat eńbek mıgranttaryn jumysqa ornalastyrý kezeńinde kelisimge qatysýshy memleketterdiń aýmaqtarynda eńbek mıgranttary men olardyń otbasy múshelerin erikti medıtsınalyq saqtandyrý máseleleri boıynsha taraptardyń ózara is-qımylynyń tártibi men negizgi baǵyttaryn aıqyndaıdy.
Eske sala keteıik, buǵan deıin Qazaqstan men Qatar eńbek mıgranttarynyń quqyqtaryn qorǵaý jónindegi yntymaqtastyqty rastaǵanyn jazǵanbyz.