TMD elderiniń prezıdentteri Astana týraly derekti fılmge tústi

ASTANA. QazAqparat - Táýelsiz memleketter dostastyǵy elderiniń prezıdentteri Astana týraly jańa derekti fılmniń túsirilimine qatysty, dep habarlaıdy QazAqparat QR Aqparat jáne kommýnıkatsııalar mınıstrligine silteme jasap. 

Fılmde Ázerbaıjan prezıdenti Ilham Álıev, Armenııa prezıdenti Armen Sargsıan, Qyrǵyzstan prezıdenti Sooronbaı Jeenbekov, Moldova prezıdenti Igor Dodon, Reseı prezıdenti Vladımır Pýtın, Ózbekstan prezıdenti Shavkat Mırzıeev jáne ózge de prezıdentter Astana týraly óz pikirlerimen bólisken.

«Mundaı sheshimniń qabyldanýy Qazaqstan Prezıdentinen úlken erlikti, batyldyqty jáne kemeńgerlikti talap etti», - deıdi túsirilim týraly beınerolıkte Ázerbaıjan Respýblıkasynyń prezıdenti Ilham Álıev.

«Bul ǵajaıyp bolmasa da, Qazaqstan men tutas óńir úshin eleýli oqıǵa», - dedi Reseı Federatsııasynyń prezıdenti Vladımır Pýtın.

«Salystyryp qarar bolsaq, osyndaı qysqa ýaqytta qala turǵyzǵan ózge elder bar ma, bilmeımin», - dep atap ótti Ózbekstan Respýblıkasynyń Prezıdenti Shavkat Mırzıeev.

«Shynynda da, bul adam sengisiz nárse. Muny tek uly kóshbasshylar ǵana jasaı alady», - dep pikir bildiredi Armenııa Respýblıkasynyń  prezıdenti Armen Sargsıan.

«Bul óte durys ári jan-jaqty oılastyrylǵan, bolashaqqa baǵyt alǵan kóregen sheshim», - deıdi Moldova Respýblıkasynyń prezıdenti Igor Dodon.

«Sońǵy 20 jylda Astana Ortalyq Azııanyń eń ásem astanalarynyń birine aınaldy», - dep esepteıdi Qyrǵyzstan Respýblıkasynyń prezıdenti Sooronbaı Jeenbekov.

Fılmde álemdegi eń jas astananyń qurylýy, bul jobaǵa 20 jyl burynǵy kózqaras jáne Astananyń eki onjyldyqta qandaı jetistikke jetkeni aıtylady.

Derekti fılm 5 shilde kúni 21:30-da «Habar» telearnasynan kórsetiledi jáne 6 shilde kúni 00:00-de «Habar 24» arnasy, 7 shilde kúni 08:50-de - «KTK» telearnasy qaıtalap kórsetedi.

Fılmdi QR Prezıdentiniń Teleradıokesheni ázirlegen.