TMD elderiniń nevrolog dárigerleri Almatyda bas qosýda

ALMATY. QazAqparat - Almatyda nevrolog dárigerlerdiń respýblıkalyq konferentsııasy ótip jatyr. Shara «QR tuqym qýalaıtyn júıke-bulshyqet aýrýlaryna shaldyqqan balalarǵa medıtsınalyq kómekti jetildirýdiń 2018-2019 jyldarǵa arnalǵan jol kartasy» sheńberinde uıymdastyrylǵan, dep habrlaıdy QazAqparat tilshisi.

«Balalardyń júıke júıesi aýrýlarynyń genetıkalyq negizderin zertteý - olardyń keń taralýy, aýyr túrde ótýi jáne balalardyń múgedektigine ákelýine baılanysty ózektilikke ıe. Múgedektiktiń qalyptasýy, kóptegen aýrýlardyń tez asqynýy, kópjúıelik asqynýlar, tuqym qýalaıtyn aýrýlary bar naýqastardyń ómir súrý sapasy men uzaqtyǵynyń azaıýy, orfandyq mártebe bul aýrýlardyń medıtsınalyq-áleýmettik jaǵynan mańyzdy bolýyna sebep», - deıdi «Balalar nevrologtary qaýymdastyǵy» qoǵamdyq birlestiginiń tóraıymy Marjan Lepesova.

Sharaǵa Qazaqstan men TMD-nyń ózge elderiniń balalar nevrologtary, pedıatorlar, neonatologtar, jalpy tájirıbelik dárigerler men klınıkalyq genetıkter qatysýda. Dárigerler naýqastardy emdeý tásilderimen ózara tájirıbe almasyp, osy dertke qatysty problemalardy birlesip sheshýde.

«Eki kúnge sozylatyn respýblıkalyq konferentsııa aıasynda plenarlyq dárister, farmatsevtıkalyq, dıagnostıkalyq ónim men ǵylymı-medıtsınalyq ádebıet kórmelerin ótkizý josparda. Jalpy, genetıka salasyndaǵy zertteýlerdi nevrologııalyq aýrýlarǵa qoldanýǵa bolady», - deıdi mamandar.

Konferentsııa jumysyna Shveıtsarııa, Frantsııa jáne Resseıdiń nevrolog dárigerleri moderatorlar retinde arnaıy shaqyrtylǵan.

Avtory Alma Muqanova