TMD elderiniń basshylary Elbasyn Jeńis merekesimen quttyqtady
«Bul qasterli merekeni atap óte otyryp, týǵan jerimizdi ıyq tirese qorǵaǵan jáne álemdi fashızmnen qutqarǵan ákelerimiz ben atalarymyzdyń qaıyspas qaısarlyǵy men óshpes erligin qurmetpen eske alamyz. Aǵa býynnan mura bolǵan dostyq pen ózara túsinistik dástúrleri budan ári qaraı da bizdiń elderimiz arasyndaǵy strategııalyq seriktestik pen odaqtastyq qatynastardy damytý úshin berik negiz bolady dep senemin», - delingen Reseı Prezıdenti Vladımır Pýtınniń jedelhatynda.
Belarýs Respýblıkasynyń Prezıdenti Aleksandr Lýkashenko Elbasyna zor densaýlyq, beıbitshilik pen baq-bereke tilep, quttyqtaý hat joldady.
«Kúlli belarýs halqynyń atynan jáne jeke óz atymnan Sizdi Uly Otan soǵysyndaǵy Jeńistiń 75 jyldyǵymen shyn júrekten quttyqtaımyn. Soǵys dalasyndaǵy ákelerimiz ben atalarymyzdyń erligi, sondaı-aq tyldaǵy Uly Jeńisti jaqyndatýǵa úles qosqandardyń qajyrly eńbegi biz úshin óshpes maqtanysh, sheksiz patrıotızm men Otanǵa degen súıispenshiliktiń úlgisi bolyp qala beredi», - delingen A.Lýkashenkonyń hatynda.
Qyrǵyz Respýblıkasynyń Prezıdenti Sooronbaı Jeenbekov óz jedelhatynda Uly Jeńis – jaýmen ıyq tirese soǵysqan jáne álemdi fashızmnen qutqarǵan bizdiń halyqtarymyzdyń baǵa jetpes qazynasy ekendigin atap ótti.
«Búgin biz sarbazdar men tyl eńbekkerlerine qurmet kórsetip, beıbitshilik pen bostandyqty saqtap qalǵany úshin atalarymyz ben analarymyzǵa zor rızashylyǵymyzdy bildiremiz. Ata-babalarymyzdyń erligin urpaqtan-urpaqqa jetkizý – qasterli boryshymyz ben mindetimiz», - delingen jedelhatta.
Nursultan Nazarbaevtyń atyna Moldova Respýblıkasynyń Prezıdenti Igor Dodonnyń atynan da quttyqtaý jedelhaty kelip tústi.
«Osy kúnderi 75 jyldyǵyn atap ótip jatqan barshamyzǵa ortaq Uly Jeńiske degen úlken maqtanysh sezimmen Sizdi shyn júrekten quttyqtaımyn jáne baqyt, ıgilik pen baq-bereke tileımin. 1945 jyldyń 9 mamyry – Dostastyqtyń barlyq elderi úshin erekshe kún, keńes halqynyń erligi men abyroıynyń nyshany», - delingen I.Dodonnyń quttyqtaýynda.
Armenııa Respýblıkasynyń Premer-Mınıstri Nıkol Pashınıan óz hatynda myqty densaýlyq, qajymas qaırat pen sáttilik tiledi.
«Bul kúni biz maıdandaǵy erligi men tyldaǵy qaısarlyǵy fashızmdi jeńýge sheshýshi úles qosqandardy maqtanyshpen eske alamyz. Bizdiń ortaq mindetimiz – jeńis jolynda qandaı qıyndyq kórgenimizdi este saqtaý, fashızmdi dáripteý, soǵysqumar ultshyldyq pen ksenofobııa ıdeologııasyn taratý áreketterine birlese qarsy turý», - delingen jedelhatta.
