TMD elderi transulttyq qylmystarmen kúreske baǵyttalǵan jedel-tergeý toptaryn qurady

ASTANA. QazAqparat Búgin Parlament Senaty Konstıtýtsııalyq zańnama, sot júıesi jáne quqyq qorǵaý organdary komıtetiniń keńeıtilgen otyrysy bolyp ótti. Onda senatorlar «Táýelsiz Memleketter Dostastyǵyna qatysýshy memleketterdiń aýmaqtarynda birlesken jedel-tergeý toptaryn qurý tártibi jáne olardyń qyzmeti týraly kelisimdi ratıfıkatsııalaý týraly» zań jobasyn talqylady.

«Kelisimge 2015 jylǵy 16 qazanda Býrabaı kentinde Armenııa, Belarýs, Qazaqstan, Qyrǵyz, Tájikstan, Ózbekstan, Reseı Federatsııasynyń basshylary qol qoıǵan. Qujat negizinen TMD aýmaǵynda birlesken jedel-tergeý toptaryn qurý men olardyń jumys tártibi qarastyrylyp otyr»,  dedi Іshki ister vıtse-mınıstri Erlan Turǵymbaev.
Onyń aıtýynsha, birlesken jedel-tergeý toptary transulttyq qylmystardyń jolyn kesý maqsatynda qurylady, atap aıtqanda, olar Ortalyq Azııa elderi men Qazaqstan aýmaǵy arqyly ótetin esirtki trafıginiń jolyn kesý úshin birlesken jáne kelisilgen sharalardy qamtıtyn bolady.
Tutastaı alǵanda, Kelisim TMD Konventsııasynyń quqyqtyq kómekter týraly 63-babyn qoldanýdy naqtylap, azamattyq, otbasylyq jáne qylmystyq ister boıynsha quqyqtyq qatynastardy retteýge múmkindik beredi.
Zań jobasyn qabyldaý respýblıkalyq bıýdjetten qosymsha qarjy shyǵyndaryn talap etpeıdy, teris áleýmettik-ekonomıkalyq jáne quqyqtyq saldarǵa soqtyrmaıdy. 
Jalpy kelisim TMD qatysýshy memleketteriniń qylmysqa qarsy kúrestegi yntymaqtastyq tıimdiligin arttyrady. Jedel-tergeý qyzmetin atqarýdaǵy naqty sharalar Qazaqstannyń tergeý qyzmetteriniń de tıimdiligin kóteredi. Zań jobasy palatanyń aldaǵy jalpy otyrysyna shyǵarylady.