TMD elderi mınadan tazartý baǵytynda birlesip jumys isteıdi

NUR-SULTAN. QazAqparat – Parlament Májilisiniń jalpy otyrysynda «Táýelsiz Memleketter Dostastyǵyna qatysýshy memleketter qarýly kúshteriniń birlesken gýmanıtarlyq mınasyzdandyrý ınjenerlik bólimshesi týraly kelisimdi ratıfıkatsııalaý týraly» zań jobasy maquldandy, dep habarlaıdy QazAqparat tilshisi, dep habarlaıdy QazAqparat tilshisi.

Táýelsiz Memleketter Dostastyǵyna qatysýshy memleketter qarýly kúshteriniń birlesken gýmanıtarlyq mınasyzdandyrý ınjenerlik bólimshesi týraly kelisim 2020 jylǵy 18 jeltoqsanda jasaldy.

«Kelisimniń maqsaty – gýmanıtarlyq mınısyzdandyrý tapsyrmalaryn oryndaý úshin birlesken bólimsheni qurý, qoldaný, onyń qyzmetin aıaqtaý tártibin jáne mártebesin aıqyndaý. Birlesken bólimsheniń negizgi mindetteri – mına alańdaryna jáne jarylý qaýpi bar zattardyń bolýyna tehnıkalyq barlaý jasaý, sondaı-aq olardy mınasyzdandyrý», - dedi QR Qorǵanys mınıstriniń orynbasary Tımýr Dándibaev.

Onyń aıtýynsha, gýmanıtarlyq mınısyzdandyrý operatsııalaryna qatysý úshin ulttyq ınjenerlik bólimsheni jiberý týraly sheshimdi jiberýshi tarap óziniń ulttyq zańnamasyna sáıkes qabyldaıdy.

Kelisimde TMD-ǵa qatysýshy memleketter bolyp tabylmaıtyn memleketterdiń aýmaqtarynda gýmanıtarlyq mınasyzdandyrý mindetterin oryndaýǵa Birlesken bólimsheni tartý múmkindigi kózdelgen.

Qazaqstan Respýblıkasy mundaı baǵyt BUU Qaýipsizdik Keńesiniń mandatyna sáıkes ǵana múmkin bolady dep esepteıdi.