TMD elderi QR-dyń sot júıesin damytý modelin ózderine úlgi etip aldy - Mámı
ASTANA. QazAqparat - Qazaqstannyń sot júıesin damytý modelin TMD-nyń basqa elderi basshylyqqa aldy.
Bul týraly búgin Respýblıka sýdıalarynyń VII sezinde QR Joǵarǵy sotynyń tóraǵasy Qaırat Mámı málim etti, dep habarlaıdy QazAqparat
Qaırat Mámı óz sózinde sezd el Táýelsizdiginiń 25 jyldyǵyn merekeleý sheńberinde ótip jatqandyǵyn atap ótti. Sonymen qatar ol osy jyldar ishinde Qazaqstan demokratııalyq saıası-quqyqtyq júıesi bar memleket retinde qalyptasyp, álemdik arenada joǵary bedelge ıe bolǵanyn, Memleket basshysynyń beıbit jáne turaqty damýdy qamtamasyz etý jónindegi ǵalamdyq bastamalary men naqty isteri halyqaralyq qaýymdastyq tarapynan qoldaý tapqanyn basa aıtty.
«Sottar halyqaralyq standarttarǵa sáıkes keletin jańa turpattaǵy sot qurylymy men sot isin júrgizýdi qalyptastyrý boıynsha strategııalyq maqsatty basshylyqqa aldy. Búginde mundaı sot júıesi qalyptasty jáne tabysty damýda», - dedi Mámı.
Joǵarǵy sot tóraǵasy táýelsizdik jyldary ishindegi sot júıesin damytýdyń birqatar negizgi nátıjelerin atap ótti.
«Sottardyń táýelsizdigi men sýdıalardyń mártebesi aıryqsha bekitildi, sot qurylymy men sot isin júrgizýde túbegeıli ózgerister oryn aldy. Tórelik sottardy taratý nátıjesinde qurylǵan sharýashylyq ister jónindegi alqalardy qosý jolymen Joǵarǵy sot pen oblystyq sottar qaıta quryldy. 20 jyldan keıin Qazaqstannyń osy tájirıbesin TMD-nyń basqa elderi basshylyqqa aldy», - dedi ol.
