TMD elderi kólik urlyǵymen birlese kúresý tetikterin jetildirmek

NUR-SULTAN. QazAqparat – Іshki ister mınıstri Erlan Turǵymbaev Májiliste TMD-ǵa múshe memleketterdiń avtokólik urlyǵyna qarsy birlese kúresýdi kúsheıtýge baǵyttalǵan zań jobasyn tanystyrdy, dep habarlaıdy QazAqparat tilshisi.

Tolyǵyraq aıtqanda mınıstr «2005 jylǵy 25 qarashadaǵy TMD-ǵa qatysýshy memleketterdiń avtokólik quraldaryn jymqyrýǵa qarsy kúrestegi jáne olardy qaıtarýdy qamtamasyz etýdegi yntymaqtastyǵy jaıly kelisimge ózgerister engizý týraly hattamany ratıfıkatsııalaý týraly» zań jobasyn tanystyrdy. Atalǵan hattamaǵa osydan 15 jyl buryn Moldova, Qyrǵyz Respýblıkasy, Reseı, Tájikstan, Belarýs pen Qazaqstan qol qoıǵan.

«Hattamanyń negizgi maqsaty – urlanǵan avtokólik ıeleriniń quqyǵynyń qorǵalýyn qamtamasyz etýdegi tıimdilikti arttyrý. Qazirgi tańda 2005 jyldan beri kúshine engen kelisimge múshe-memleketterdiń quziretti organdary keıde kólikti qaıtarýǵa qatysty suranystardy qanaǵattandyra bermeıdi. Qazaqstanda osy ýaqyttyń ishinde 220 kólik urlanyp, onyń tek 30 paıyzy ǵana elge qaıtarylǵan. Osyǵan baılanysty Kelisimge suranysty oryndaýdyń bir aılyq merzimi bekitiledi. Sonymen qatar suranys boıynsha aqparatty berýden bas tartýdyń naqty negizdemesi de aıqyndalady», - dedi Erlan Turǵymbaev.

Hattamanyń kómegimen joǵaryda atalǵan memleketter esepten alynyp qalǵan kólikterdiń málimetterin almasý múmkindigine de ıe bolmaq.