TMD elderi basshylary otbasylyq qundylyqtardy qoldaý týraly málimdeme qabyldady

ASTANA. QazAqparat - Nursultan Nazarbaev TMD-ǵa múshe memleketter basshylary keńesiniń keńeıtilgen quramda ótken otyrysyna qatysty, dep habarlaıdy QazAqparat.

Jıynda Memleket basshylary TMD aıasyndaǵy ózara is-qımyldy odan ári nyǵaıtý joldaryn talqylap, dostastyqtyń tıimdiligin arttyrý men oǵan múshe elderdiń saýda jáne ınvestıtsııalyq baılanystaryn tereńdetý máseleleri jóninde pikir almasty.

Sonymen birge, otyrysta Tájikstan Respýblıkasynyń TMD-ǵa tóraǵalyq etý kezeńinde atqaratyn jumys jospary, Túrikmenstannyń dostastyqty odan ári damytýǵa qatysty ustanymy jáne TMD-nyń Parlamentaralyq assambleıasy aıasynda atqarylǵan jumys nátıjeleri tyńdaldy.

Keńes otyrysynyń qorytyndysy boıynsha sybaılas jemqorlyqqa jáne qylmystyq jolmen alynǵan tabystardy zańdastyrýǵa qarsy kúres salasyndaǵy qujattarǵa qol qoıyldy.

Budan bólek, TMD elderiniń basshylary mádenıet, bilim berý, ǵylym jáne týrızmge qatysty baılanystardy nyǵaıtýǵa ári keńeıtýge baǵyttalǵan gýmanıtarlyq saladaǵy birqatar mańyzdy sheshimderdi qarastyryp, otbasyn jáne dástúrli otbasylyq qundylyqtardy qoldaý týraly málimdeme qabyldady.