TMD elderi zańsyz qarjy aınalymyna qarsy halyqaralyq ortalyq qurdy
ASTANA. KAZINFORM – Senatta TMD elderiniń zańsyz qarjy aınalymyn anyqtaýǵa kómektesetin halyqaralyq ortalyǵyn qurý týraly kelisim bekitildi.
Joǵarǵy palata Májilis qabyldaǵan «Qylmystyq jolmen alynǵan kiristerdi zańdastyrý (jylystatý) jáne terrorızmdi qarjylandyrý qaýip-qaterine baǵa beretin halyqaralyq ortalyqty qurý týraly kelisimdi ratıfıkatsııalaý týraly» zańdy maquldady.
Qarjy jáne bıýdjet komıtetiniń tóraǵasy Sultanbek Mákejanov bul kelisimge TMD memleket basshylary 2023 jyldyń qazan aıynda Bishkek qalasynda qol qoıǵanyn atap ótti. Atalǵan ortalyq TMD elderiniń ulttyq ekonomıkalary men qarjy júıelerin, qylmystyq kiristerdi jylystatý jáne terrorızmdi qarjylandyrý qaterlerinen qorǵaýǵa baǵyttalǵan jáne syn-qaterlerdi baǵalaýmen aınalysady.
– Bul Halyqaralyq ortalyq qorǵalǵan aqparattyq júıe retinde jumys istep, TMD elderiniń qarjylyq barlaý bólimsheleri arasynda tıimdi memleketaralyq ózara is-qımyldy, ortaq aqparattyq resýrstardy qalyptastyrýdy jáne táýekelderdiń ulttyqtan joǵary deńgeıde baǵalanýyn qamtamasyz etedi. Oǵan qosa, qarajattyń tranzıttik qozǵalysyn, aktıvterdiń túpkilikti ornalastyrylýyn, sondaı-aq salyqtyq qylmystar men sybaılas jemqorlyq boıynsha málimetter almasýdy qosa alǵanda, transshekaralyq qylmystyq toptardyń qyzmetin taldaıdy, – dedi S.Mákejanov Senat otyrysyndaǵy baıandamasynda.
Halyqaralyq ortalyq ulttyq jáne halyqaralyq deńgeıde qylmystyq jolmen alynǵan kiristerdi zańdastyrý jáne terrorızmdi qarjylandyrýmen baılanysty táýekelderdi baǵalaıdy. TMD elderi arasyndaǵy jedel aqparat almasýdy qamtamasyz etedi.
Sonymen birge, kiristerdi zańdastyrý men terrorızmdi qarjylandyrýdy aldyn alý, onymen kúresý úshin halyqaralyq standarttar men usynymdardy aldyn ala ázirlep, engizedi.
Ortalyq qarjy monıtorıngi jáne táýekelderdi baǵalaý salasyndaǵy mamandardy oqytady, olardyń biliktiligin arttyrady jáne qarjy ınstıtýttary, quqyq qorǵaý organdary jáne basqa da múddeli taraptar arasyndaǵy yntymaqtastyqty nyǵaıtady.
– Búginde dúnıe júzinde jasandy ıntelekttiń erekshe damýyna baılanysty bul halyqaralyq ortalyqtyń qurylýy óte mańyzdy. Sebebi ortalyq qarjylyq aqparatty jan-jaqty zerdeleıtin zamanaýı aqparattyq-taldaý júıesi retinde uıymdastyrylǵan. TMD Atqarýshy komıtetiniń habarlaýynsha, ortalyqtyń taldaý júrgizýge arnalǵan tıisti tehnologııalyq platformasy qazirdiń ózinde joba retinde iske qosylyp, óz jumysynyń tıimdiligin is júzinde kórsetip tur, – dedi Senat depýtaty.
Kelisimdi Armenııa, Belarýs, Qyrǵystan, Reseı, Tájikstan jáne Ózbekstan memleketteri óz parlamentteri arqyly ratıfıkatsııalaǵan.
Buǵan deıin Senat depýtattary Joǵarǵy sottyń úsh sýdıasyn qyzmetinen bosatty.