TMD-da Elbasynyń bastamalary belsendi iske asyrylyp jatyr

ASTANA. QazAqparat - TMD aıasynda QR Prezıdenti Nursultan Nazarbaevtyń bastamalary belsendi júrip jatyr. Bundaı pikirdi QR SІM Halyqaralyq aqparat komıtetiniń ekinshi hatshysy Almaz Búrkitbaev bildirdi, dep habarlaıdy QazAqparat.

«Barshamyzǵa málim, 2015 jyly Býrabaıdaǵy TMD Sammıtinde QR Prezıdenti Nursultan Nazarbaev jańa syn-qaterlerge neǵurlym tıimdi áreket etý maqsatynda TMD-ny transformatsııalaýǵa baǵyttalǵan birqatar bastamalardy usyndy. Ótken jyly TMD-ǵa qatysýshy elder memleket basshylarynyń Bishkekte ótken kezekti kezdesýinde Qazaqstan Prezıdentiniń bastamalaryna negizdelgen Dostastyqty qazirgi zamanǵy jaǵdaıǵa beıimdeý boıynsha sheshim qabyldanǵan edi. Al Sochıdegi sońǵy Sammıt barysynda da TMD basshylary saýda-ekonomıkalyq qatynastar, ınvestıtsııalyq baılanystar, sybaılas jemqorlyqqa qarsy kúres máselelerimen qatar Dostastyqtyń tıimdiligin arttyrý jóninde pikir almasty», - dep toqtaldy Almaz Búrkitbaev.

Osy oraıda ol jalpy transformatsııa úderisi, ásirese halyqaralyq uıymǵa qatysty, ol óte uzaq jáne muqııat zerdeleýdi talap etetinin, alaıda  Elbasy bastaǵan bul úderis dál qazir óte belsendi júrip jatqanyn atap ótti.

«Árıne, mádenıet, bilim, ǵylym, týrızm salalaryndaǵy yntymaqtastyqty odan ári damytý boıynsha qabyldanǵan birqatar mańyzdy sheshimderdi atap ótkenimiz jón. Olar - TMD elderine dástúrli bolyp tabylatyn jáne ózektiligin joǵaltpaıtyn salalar»,-dep túıindedi sózin Halyqaralyq aqparat komıtetiniń ekinshi hatshysy.

Budan buryn habarlanǵandaı, osy aptada Reseıdiń Sochı qalasynda TMD Memleket basshylary keńesi ótti . Dostastyq elderiniń prezıdentteri Keńestiń otyrysyna qatysty. 

Osy oraıda Qazaqstan Prezıdenti Nursultan Nazarbaev TMD Memleket basshylary keńesi men Joǵary Eýrazııalyq ekonomıkalyq keńes jıyndary tabysty ótkenin málim etti .