TMD-da áskerı yntymaqtastyqty damytý máseleleri Máskeýde talqylandy

MÁSKEÝ. QazAqparat - Qorǵanys mınıstriniń birinshi orynbasary, QR Qarýly Kúshteri Bas shtabynyń bastyǵy, general-leıtenant Murat Maıkeev TMD-ǵa múshe memleketterdiń Qarýly Kúshteri shtab bastyqtary komıtetiniń otyrysyna qatysty. Bul týraly Qazaqstannyń qorǵanys vedomstvosynan málim etti, dep habarlaıdy «QazAqparat» HAA tilshisi.

Kezdesý barysynda TMD memleketteri shtabtarynyń basshylary qazirgi zamanǵy mindetterdi eskere otyryp, áýe shabýylyna qarsy birlesken júıeni odan ári damytý máselesin pysyqtady. Sondaı-aq álemde qalyptasyp otyrǵan áskerı-saıası jaǵdaıǵa qatysty pikir almasyp, Dostastyq memleketteriniń qaýipsizdigine qaterler men qaýipterdi taldady.

Otyrys qorytyndysy boıynsha 2025 jylǵa deıingi áskerı yntymaqtastyqty damytýdyń kontseptýaldyq negizderi bekitildi, aeroǵaryshtyq qorǵanys mindetterin sheshý úshin birlesken áýe qorǵanysy júıesin beıimdeý joldary kelisildi jáne kelesi jylǵa birlesken is-sharalar belgilendi.

Kezdesý barysynda QR Qarýly Kúshteri Bas shtabynyń bastyǵy, general-leıtenant Murat Maıkeev Reseı men Armenııa Qarýly Kúshteri Bas shtabtarynyń bastyqtary, armııa generaly Valerıı Gerasımov pen general-leıtenant Artak Davtıanmen ekijaqty kezdesýler ótkizdi. Taraptar áskerı yntymaqtastyqty odan ári damytýdyń basymdyqtaryn talqylady.