TMD boıynsha áskerı kýrsanttar arasyndaǵy zııatkerlik dodada Qazaqstan ekinshi oryn aldy
ASTANA. KAZINFORM — Almaty qalasynda TMD-ǵa múshe memleketterdiń joǵary áskerı oqý oryndarynyń kýrsanttary arasynda ótken H Halyqaralyq matematıka olımpıadasy óz máresine jetti. Bul týraly Qorǵanys mınıstrligi málim etti.
Zııatkerlik dodaǵa alty eldiń ókilderi qatysty: Belarýs, Qazaqstan, Qyrǵyzstan, Reseı, Ózbekstan jáne Tájikstan. Olımpıada úsh kezeńnen turdy jáne matematıkanyń ártúrli bólimderi boıynsha tapsyrmalardy qamtydy. Bul qatysýshylardyń daıyndyq deńgeıin jan-jaqty baǵalaýǵa múmkindik berdi.
Jalpy komandalyq esep boıynsha úshinshi oryndy Ózbekstan komandasy ıelense, ekinshi oryn Qazaqstan kýrsanttaryna buıyrdy, al birinshi oryndy Reseı komandasy jeńip aldy.
Jeke birinshilikte úzdik nátıjeni Vladıslav Molofeev (Reseı), Nýralıbek Ózbekov (Ózbekstan), Islam Ermekov (Qazaqstan) kórsetti.
Jeńimpazdar TMD-ǵa múshe memleketterdiń Qorǵanys mınıstrleri keńesiniń tóraǵasynyń aýyspaly kýbogymen, sondaı-aq medaldarmen, gramotalarmen jáne baǵaly syılyqtarmen marapattaldy.
Radıoelektronıka jáne baılanys áskerı-ınjenerlik ınstıtýtynyń bastyǵy general-maıor Nurtas Qabaqov olımpıadanyń mańyzdy nátıjeleriniń biri — Dostastyq elderiniń qarýly kúshteri arasyndaǵy kásibı jáne dostyq baılanystardyń nyǵaıýy ekenin atap ótti.
— Mundaı is-sharalar tek kásibı quzyretterdi ǵana emes, bolashaq ofıtserler arasyndaǵy áriptestik rýhty da qalyptastyrady. Alǵan bilim men tájirıbe olardyń aldaǵy qyzmetinde mindetti túrde qajet bolady dep senemin, — dedi ol.
Zııatkerlik saıystardan bólek, qatysýshylar úshin mazmundy mádenı-aǵartýshylyq baǵdarlama uıymdastyryldy. Qonaqtar Qazaqstannyń tarıhymen, qazirgi jetistikterimen jáne qazaq halqynyń qonaqjaı dástúrlerimen tanysty.
Eske sala keteıik, buǵan deıin Qorǵanys mınıstrligi Radıoelektronıka jáne baılanys áskerı-ınjenerlik ınstıtýtynyń kýrsanttary respýblıkalyq baǵdarlama jasaqtaý olımpıadasynda birinshi jáne ekinshi oryndardy enshilep, barynsha daıyndalǵandaryn kórsetip, eldiń jetekshi ýnıversıtetteriniń komandalarynan senimdi túrde basyp ozǵan edi.
