TMD baıqaýshylarynyń mıssııasy saılaý komıssııasy músheleriniń sanyn arttyrýdy usyndy

«Mıssııa shtaby TMD Parlamentaralyq Assambleıasynyń demokratııanyń damýyn, parlamentarızm jáne azamattardyń quqyqtarynyń saqtalýyn monıtorıngileý halyqaralyq ınstıtýtymen birge Qazaqstan Respýblıkasynyń saılaý zańnamasyna taldaý jasady», - dedi TMD baıqaýshylary mıssııasynyń basshysy Sergeı Lebedev.

«QR Saılaý týraly» konstıtýtsııalyq zańnyń keıbir erejeleri naqtylansa deımiz. Mysalǵa, bizdiń pikirimizshe, saılaýshylary kóp ýchaskelerde saılaý komıssııasy músheleriniń sanyn arttyrýǵa múmkindik berý máselesin qarastyrýǵa bolady. Men jáne meniń áriptesterim, ózge qatysýshylarmen birge keıbir ýchaskelerde uzyn-sonar kezekterdi kórdik. Árıne, bul saılaýshylardyń kóńiline qaıaý túsirmeı qoımady», - dedi ol.

Onyń sózine qaraǵanda, saılaýshylardyń sanyna qaramastan saılaý ýchaskelerinde saılaý komıssııasynyń tek jeti múshesiniń ǵana bolýy durys emes.

«Onymen birge biz, konstıtýtsııalyq zańdy halyqaralyq baıqaýshylarǵa saılaý protsesin retteıtin barlyq qujattarǵa qol jetimdikti qarastyratyn jáne saılaý komıssııasynan zańnamada kórsetilgen qujattardyń kóshirmesin alýǵa ruqsat beretin erejelermen tolyqtyrýdy usynar edik. Biz olardy onsyz da aldyq. Degenmen zań júzinde bekitilse ıgi», - dedi mıssııa basshysy.

«Biz, QR zańnamasy TMD-ǵa qatysýshy memleketterdiń demokratııalyq saılaýlar, saılaý quqyǵy men bostandyǵy týraly konventsııasynyń erejelerine jaýap beredi degen túıin jasadyq. Jáne ol zańnama erkin jáne demokratııalyq saılaýlardy ótkizýge múmkindik beredi», - dep aıaqtady sózin Lebedev.