TMD baıqaýshylar mıssııasy saılaý naýqanyn monıtorıngileýge kiristi

ASTANA. QazAqparat – TMD baıqaýshylar mıssııasy elimizdegi prezıdent saılaýy naýqanyn monıtorıngileýge kiristi. Bul týraly TMD Atqarýshy komıteti tóraǵasynyń – atqarýshy hatshysynyń orynbasary Ilhom Nematov aıtty, dep habarlaıdy QazAqparat tilshisi.

«TMD baıqaýshylar mıssııasy saılaý naýqanyn monıtorıngileýge kiristi. Búgin biz uıymdastyrý máselelerin sheshýmen aınalysatyn mıssııa shtabyn ashamyz. Shtab óńirlerge qysqa merzimdi, uzaq merzimdi baıqaýshylardy bólý, Qazaqstannyń saılaý zańnamasyn baǵalaý máselelerimen aınalysatyn bolady. Mıssııa basshysy TMD Atqarýshy komıtetiniń tóraǵasy Sergeı Lebedev bolady. Maǵan mıssııamyzdyń ashylýyna qatysý tapsyryldy», - dedi ol Ortalyq saılaý komıssııasynda ótken brıfıngide.

Onyń atap ótýinshe, mıssııa quramyna TMD-niń barlyq eliniń ókili, TMD Parlamentaralyq Assambleıasynyń, Reseı-Belarýs odaqtas memleketiniń Parlamenttik Assambleıasynyń ókilderi, Astanada akkredıttelgen dıplomattar jáne TMD Atqarýshy komıtetiniń qyzmetkerleri kiredi.

«100-den astam adam bolady. 10 adam - uzaq merzimdi baıqaýshy. 100-den astam adam qysqa merzimdi baıqaýshy. Uzaq merzimdi baıqaýshylar kelip, akkredıtatsııadan ótti. Qysqa merzimdi baıqaýshylar Qazaqstanǵa saılaý qarsańynda eki-úsh kún qalǵanda keledi. Árıne, biz barlyq aımaqty jáne saılaý ýchaskelerin qamtýǵa tyrysamyz. Baıqaýshylar saılaý ýchaskelerine, aýmaqtyq saılaý komıssııalaryna barady, saılaý naýqanyna daıyndyq barysyn talqylaıdy», - dedi Ilhom Nematov.