TMD Bas hatshysy Sergeı Lebedev: Kún tártibinde 13 másele men 17 jobalyq qujat bar

ALMATY. KAZINFORM — Almatyda TMD Syrtqy ister mınıstrleri keńesiniń otyrysy ótip jatyr. Kún tártibinde 13 másele men 17 jobalyq qujat qaralady. Bul týraly Táýelsiz Memleketter Dostastyǵynyń Bas hatshysy Sergeı Lebedev málimdedi.

Onyń aıtýynsha, keńeske qatysýshylar maquldaǵan jaǵdaıda atalǵan qujattyń altaýy Memleket basshylary keńesiniń qaraýyna jiberiledi.

Atap aıtqanda, 13-shi másele – Jeńiske úles qosqan qalalarǵa «Eńbek dańqy qalasy» ataǵyn berýdi 9 mamyrǵa deıin rásimdeý úshin ony jumys tártibimen memleket basshylaryna qol qoıýǵa joldaý usynylady.

Sondaı-aq Sergeı Lebedev bir kún buryn úkimettiń ishki rásimderi aıaqtalmaǵandyqtan, úsh másele kún tártibinen shyǵarylǵanyn atap ótti. 

Degenmen, olarmen jumys jalǵasýda jáne olar Dostastyqtyń kún tártibinde qalady, biraq keıinge shegeriledi.

Budan bólek, aldaǵy ýaqytta taǵy bes qujatty qaraýǵa jiberý josparda.

— Búgin qaralyp jatqan qujattarǵa qatysty barlyq usynys pen eskertýler keshegi otyrysta qatysýshy memleketterdiń ókilderimen aldyn ala kelisildi. Osylaısha, barlyq qujattar saraptamadan ótip, maquldandy jáne qaraýǵa daıyn, — dep atap ótti Lebedev.

Aıta keteıik, Almatyda TMD Syrtqy ister mınıstrleri keńesi ótip jatyr.