TMD aıasynda ıntegratsııalanǵan valıýta naryǵyn uıymdastyrýdaǵy yntymaqtastyq kelisimi maquldandy - Májilis

ASTANA. QazAqparat - Búgin QR Parlamenti Májilisiniń jalpy otyrysynda «Táýelsiz Memleketter Dostastyǵyna qatysýshy memleketterdiń ıntegratsııalanǵan valıýta naryǵyn uıymdastyrý salasyndaǵy yntymaqtastyq týraly kelisimdi ratıfıkatsııalaý týraly» zań jobasy maquldandy.

Ulttyq bank tóraǵasynyń orynbasary Oleg Smolıakovtyń aıtýynsha, Táýelsiz Memleketter Dostastyǵyna qatysýshy memleketterdiń ıntegratsııalanǵan valıýta naryǵyn uıymdastyrý salasyndaǵy yntymaqtastyq týraly kelisim 2012 jylǵy 5 jeltoqsanda Ashhabadta jasalǵan. Kelisim TMD-ǵa qatysýshy elderdiń ıntegratsııalanǵan valıýta naryǵynda shetel valıýtalarymen konversııalyq operatsııalar jasaýǵa taraptardyń rezıdent-bankteriniń teń quqyly jáne ózara tıimdi qatysýy úshin jaǵdaılar jasaýdy kózdeıdi. Osyǵan oraı, taraptardyń árqaısysy basqa taraptyń rezıdent-bankterine usynylǵannan qolaılylyǵy kem emes jaǵdaılarda bankaralyq konversııalyq operatsııalardy júrgizý úshin óziniń ulttyq valıýta naryǵyna kirýin qamtamasyz etedi. Sonymen qatar, bankaralyq konversııalyq operatsııalardy jasaǵan kezde teń básekelestik jaǵdaılardy qamtamasyz etý maqsatynda quzyretti organdardyń kelisimdi iske asyrý jónindegi is-qımyldaryn úılestirý TMD-ǵa qatysýshy memleketterdiń valıýta-qarjy salasynda ózara is-qımyl jasaýyn júzege asyratyn Uıymnyń organyna júkteledi. Májilis maquldanǵan zań jobasy Parlament Senatyna joldanady.