TMD aýmaǵynda tuńǵysh ret Almatyda «Anna Karenına» baletiniń premerasy bolady
ALMATY. 10 maýsym. QazAqparat /Názıra Eleýhan/ - Reseıden keıin TMD aýmaǵynda alǵash ret Almatydaǵy Abaı atyndaǵy memlekettik akademııalyq opera jáne balet teatrynyń sahnasynda
18-19 maýsym kúnderi reseılik horeograf, baletmeıster, Sankt-Peterbor memlekettik akademııalyq balet teatrynyń kórkemdik jetekshisi, Reseıdiń halyq ártisi Borıs Eıfmannyń «Anna Karenına» baletiniń premerasy bolady.
Esterińizge sala ketsek, «Anna Karenınanyń» álemdik premerasy Borıs Eıfmannyń teatrynda 2005 jyly 1 sáýirde ótti. Atalmysh spektakl úshin Borıs Eıfman «Benýa-de-la-Dans» ("balet Oskary", negizi 1991 jyly qalanǵan) halyqaralyq bı jáne horeogorafııalyq syılyǵynyń ıegeri atandy. Al basty róldi somdaǵan Marııa Abashova balettegi úzdik róli úshin «Altyn perde» syılyǵynyń laýreaty atanǵan bolatyn.
«Anna Karenına» - ishki psıhologııalyq qýatqa baı jáne emotsıonaldyq áser etý kúshi orasan zor baletterdiń qataryna engen qoıylymnyń biri.
Lev Tolstoıdyń romanynyń jelisi boıynsha qoıylǵan balette horeograf Anna-Karenın-Vronskıı úshtigine basa nazar aýdarǵan. Deneniń plastıkasy arqyly avtor óz spektaklinde azǵyndap ketken áıeldiń beınesin, dramasyn kórsetýge umtylǵan. Qumarlyq sezimi boıyn bılep-tóstegen áıel adam qandaı da bolmasyn qurbandyqqa barýǵa ázir. Horeograftyń aıtýynsha, onyń spektakli ótken kúnder emes, qazirgi zaman týraly syr shertedi - osy zamanǵy emotsııalar, aqıqattyq bolmyspen tike salystyrýlar júrgizýi osy kúngi qandaı da bir kórermendi enjar qaldyra almaıdy. Joǵary deńgeıde oryndalǵan tehnıka men horeografııanyń arqasynda Tolstoıdyń romanyndaǵy psıhologııalyq ıirimder naqyshyna keltirile tolyq jetkizilgen.
