TMD aýmaǵynda áskerı operatsııalarǵa qatysqandar soǵys ardagerlerine teńestiriledi
Eske salaıyq, «1994 jylǵy 15 sáýirdegi Uly Otan soǵysynyń qatysýshylary men múgedekterine, basqa memleketterdiń aýmaǵyndaǵy urys qımyldaryna qatysýshylarǵa, qaza tapqan áskerı qyzmetshilerdiń otbasylaryna arnalǵan jeńildikter men kepildikterdi ózara taný týraly kelisimge ózgerister men tolyqtyrýlar engizý týraly hattamany ratıfıkatsııalaý týraly» zań jobasy talqylanǵan bolatyn.
Densaýlyq saqtaý jáne áleýmettik damý mınıstri Tamara Dúısenovanyń aıtýynsha, táýelsizdik alǵan alǵashqy jyldary jekelegen sanattaǵy azamattardy, sonyń ishinde Uly Otan soǵysyna qatysýshylardy áleýmettik qorǵaýdy qamtamasyz etýde osy kelisim mańyzdy ról atqardy.
«Búgingi kúni TMD memleketteriniń áleýmettik-ekonomıkalyq salasynda ulttyq zańnamalary qalyptasty. Sonymen qatar, ár eldiń ózderiniń áleýmettik saıasaty baǵytynda spetsıfıkalyq úlgileri jasalǵan. Al Kelisimge kelsek, ol burynǵy keńestik júıeniń jeńildikteri men kepilderine negizdelgen. Sondyqtan da, osy qujatqa ózgerister men tolyqtyrýlar engizý qajettigi týyndap otyr», - dep túsindirdi mınıstr T. Dúısenova.
Hattama negizinen birqatar TMD memleketterinde aqshalaı tólemderdiń naqty jeńildiktermen aýystyrylýyn esepke ala otyryp, ózektendirýdi qarastyrady. Bunymen qosa, soǵys ardagerlerine basqa TMD memleketteriniń aýmaǵynda ýaqytsha bolýy kezindegi beriletin kepilderdiń tizimi naqtylanady.
Budan bólek, kelisim qamtylatyn tulǵalar sanaty da keńeıtilip otyr. Atap aıtqanda, buǵan Ýkraına KSR-i, Belarýs KSR-i, Lıtva KSR-i, Latvııa KSR-i, Estonııa KSR-i aýmaǵynda 1944 jyldyń 1 qańtary men 1951 jyldyń 31 jeltoqsany aralyǵynda áreket etken zańsyz qurylymdar men toptardy (bandıtızm) joıý jónindegi soǵys operatsııalaryna qatysýshylar da jatqyzylady. Budan bólek, kelisim boıynsha soǵys qımyldaryna qatysqandar arasynan burynǵy KSRO azamattarynyń belgili bir sanatyn anyqtaý úshin biryńǵaı qadamdar ázirleý maqsatynda soǵys qımyldary bolǵan memleketter, qalalar, terrıtorııalar men kezeńder tizimi tolyqtyrylady.
Atalǵan hattamaǵa Dýshanbe qalasynda 2015 jyldyń 30 qazanynda qol qoıylǵan.
