Tilsiz jaýmen áýeden kúreskender: áskerı ushqyshtarǵa nagrada berildi
ASTANA. KAZINFORM — Astanada orman órtteriniń saldaryn joıýǵa qatysqan áskerı ushqyshtar marapattaldy, dep habarlaıdy Qorǵanys mınıstrliginiń baspasóz qyzmeti.
Qorǵanys mınıstri avıatsııa general-leıtenanty Dáýren Qosanov órt apatymen kúreste joǵary kásibı sheberlik, batyldyq pen erlik kórsetken Áýe kúshteriniń áskerı qyzmetshilerine memlekettik nagradalar tabys etti.
Memlekettik nagradalar Abaı oblysyndaǵy «Semeı ormany» memlekettik orman tabıǵı rezervaty men Pavlodar óńirindegi tabıǵı órtterdi sóndirýge belsendi qatysqan áskerı ushqyshtarǵa berildi. Órtke qarsy is-sharalar barysynda avıatsııa ekıpajdary jalpy kólemi shamamen 230 tonna bolatyn sýdy 115-ten astam ret áýeden tókti.
Qorǵanys vedomstvosynyń basshysy áskerı ushqyshtarǵa minsiz qyzmeti, tabandylyǵy jáne áskerı boryshyna adaldyǵy úshin shynaıy alǵysyn bildirdi. Onyń aıtýynsha, memlekettik nagradalar — áskerı qyzmetshilerdiń tabıǵı apatpen kúreste kórsetken janqııarlyǵy, tózimdiligi men jaýapkershiligine berilgen laıyqty baǵa.
— Sizder asa kúrdeli jaǵdaıda joǵary kásibı sheberlik, batyldyq pen áskerı antqa adaldyq tanyttyńyzdar. Aýqymdy tabıǵı órtterdi sóndirý kezinde sheshimdi ári úılesimdi áreket ettińizder. Qaýipti sátke qaramastan, eldi mekenderdi, adamdardyń ómirin jáne elimizdiń tabıǵı baılyǵyn qorǵadyńyzdar. Sizderdiń sheberlikterińiz ben erlikterińizdiń arqasynda tilsiz jaýdyń aýyr zardaptarynyń aldyn aldyńyzdar, — dedi ol.
Qyzmettik mindetin atqarý kezinde kórsetken erligi men sheber áreketi úshin B. Momyshuly atyndaǵy «Aıbyn» II dárejeli ordenimen 54835 áskerı bólimi komandıriniń orynbasary podpolkovnık Aıdyn Saǵıev marapattaldy.
«Jaýyngerlik erligi úshin» medaline avıatsııalyq borttyń aǵa tehnıkteri kapıtan Sergeı Grıbanov (54835 áskerı bólimi) jáne kapıtan Ashat Іzmaǵambetov (19132 áskerı bólimi) laıyq dep tanyldy.
Qazaqstan Respýblıkasy Prezıdentiniń Qurmet gramotasymen Áskerı-áýe kúshteri qolbasshylyǵy basqarmasy jaýyngerlik daıarlyq basqarmasynyń aǵa ınspektor-ushqyshy polkovnık Dáýren Qaraqatov marapattaldy.
Tabıǵı órtterdiń saldaryn joıýǵa áskerı avıatsııany tartý — el turǵyndary men aýmaqtardyń qaýipsizdigin qamtamasyz etýdegi mańyzdy baǵyttardyń biri.
Joǵary memlekettik marapatqa usynylǵan áskerı qyzmetshilerdiń barlyǵy — 1-synypty mamandar. Olardyń árqaısysynyń 1500 saǵattan astam ushý tájirıbesi bar.
Memlekettik nagradalar áskerı qyzmetshilerdiń joǵary kásibı daıarlyǵy men erligine berilgen laıyqty baǵa boldy. Olardyń tabandy ári úılesimdi áreketteri tabıǵı órtterdiń zardabyn azaıtyp, adamdardyń ómiri men elimizdiń tabıǵı baılyǵyn qorǵaýǵa múmkindik berdi.
Buǵan deıin «Semeı ormany» memlekettik tabıǵı rezervaty aýmaǵynda bolǵan iri orman órtin sóndirýge 800-den astam adam, 204 tehnıka jáne 8 áýe kemesi jumyldyrylǵany belgili boldy.
